恰香港人，遲早會被國際制裁！講緊嘅未係克警住，而係巴林國家隊後衞巴吉爾，話說佢喺上個月14號作客香港踢世盃外賽後，向香港球迷做出種族歧視拉眼角嘅動作，結果禮拜一被國際足協（FIFA）重罰停賽10場，仲要罰款30,000瑞士法郎（約23.8萬港元）！
完場拉眼角歧視港人
話說巴林上個月作客香港嗰陣，攻極都攻唔入港足防線，2隊踢成0:0齊失2分，家陣有機會同港足一齊攬抄出局。賽後巴林後衞巴吉爾仲要嬲嬲豬，先同港足球員嗌交，香港球迷梗係狂噓佢啦，點知巴吉爾深深不忿，向香港人做出種族歧視行為，包括拉眼角嘅動作。
香港人經過咁多個月抗爭，已經學識點樣保護自己同反抗，隨即有球迷就同香港足總投訴巴吉爾，足總收集咗證據之後就同FIFA篤灰，結果FIFA話巴吉爾嘅行為帶有種族歧視成份，英國《太陽報》話今年七月，FIFA先將類似行為嘅最低刑期由5場加到10場，結果呢位守將罰停10場之外，仲要畀23.8萬港元罰款。
其實拉眼角嘅動作，以前都有唔少球員做過，例如巴西球星朗拿度曾經喺2002年日韓世盃做過；到上年世盃，南韓最後一場贏咗德國變相幫咗墨西哥出線，墨國人隨即喺網上發佈拉眼角嘅相表示多謝，點知南韓人睇完勁嬲，令到外國人開始知道，呢個動作帶有歧視成份。今次巴吉爾咁做係明知故犯，而且考慮到當時嘅動機，擺明係發洩，但就要為呢次愚蠢嘅舉動付出嚴重代價喇。
港迷噓國歌都罰24萬
另外，FIFA亦已經就香港上月對巴林同柬埔寨兩場主場賽事繼續有香港球迷噓國歌，同巴吉爾一樣向足總罰款23.8萬港元，理由係違反比賽秩序同安全規則；其實香港足總九月嗰陣，已經就主場對伊朗時因球迷噓國歌同組人鏈等抗爭，最終FIFA亦罰咗香港足總12萬，但喺香港目前嘅政治形勢下，相信球場內外嘅抗爭只會持續，各位球迷聖誕抗爭要萬事小心呀！