噚晚係平安夜，不過有Popo周街挑機市民，又點可能平安！特首林鄭月娥噚晚喺社交網站發放聖誕祝福短片，但同Popo一樣，市民見到佢只有嬲嬲，點會高興！
可能777有自知之明，全條片得32秒長，大部份時間影住維港夜景、摩天輪、聖誕燈飾，777現身只有11秒，講咗37隻字。由傍晚6:10發片到夜晚10:30，已吸近6,000個嬲嬲，大批市民留言，好多人乜都唔講，只有兩句：「五大訴求，缺一不可！」
藍絲亂吹波波「中風」
另一方面，777丈夫林兆波早排陪老婆去澳門出席文藝晚會，喺現場播出《歌唱祖國》時竟然唔跟大隊打拍子，網民立即當林生做「手足」、「勇武派」，不過呢個對777肯定唔係好事，於是有傳藍絲放風，話林兆波因「中風」而拍唔到手，叫大家唔好誤會佢喎！
不過有人發現，原來習晚會後搵777握手，之後都有同林兆波握手，林兆波隻手係好自然咁伸出，若果「中風」，點解拍手唔得，握手又得？難怪有民主派中人話，建制連放風消毒嘅水平都低。