又到聖誕。沈卓盈今年首以人妻身份過聖誕節，她一如以往跟家人開P慶祝，日前已趁空檔往買禮物送家人及朋友。離開無綫，回復自由身後，沈卓盈工作量大增，今年也稍稍「加碼」買禮物。年初在布吉結婚，差不多做了一年人妻，同時兼顧幕前工作，她表示非常充實，平日親自做家務的她，深得老公杜灝標（Calvin）痛錫，老公樂於包辦厭惡的洗廁所工作，沈卓盈大讚他是90分好老公。
撰文：比華利
攝影：林德雄
升呢杜太快一年的沈卓盈笑言自己是「多功能老婆」，盡力把老公杜灝標照顧得妥貼，由於要享受二人世界，他們家中未有聘請外傭，會分工合作做家務。沈卓盈日前接受《蘋果》專訪，分享這一年幸福人妻的感受：「做咗成年人妻，好充實，以前未結婚，我反而有私人空間可以行吓街，𠵱家要照顧家庭，出去係行超級巿場同街巿多咗，自己shopping少咗。」沈卓盈笑言打理一頭家其實很忙碌：「人妻好多嘢做㗎，放假就要執屋，我好鍾意每星期都將啲鞋同雜物執得好乾淨，平日見到啲嘢亂咗又會擺返好，好似拖鞋亂咗，或者老公隨手放件褸，我都會好有手尾將佢放返入間房度。男仔係隨意啲，但我好執着，堅持要放返好。」
老公洗廁所
組織家庭，一加一變二，有指夫妻婚後會投訴對方的生活小習慣，沈卓盈坦言：「咁又冇乜，兩個人生活好多唔同，彼此要互相遷就。」家務就齊齊做，沈卓盈鍾意做執拾，老公則包辦厭惡的洗廁所，「相比起，我執嘢多啲，不過如果佢冇時間唔得閒，我都會幫手洗廁所㗎，佢做嘅次數多過我喇。有時就我煮飯，佢幫手洗碗。」Calvin娶得沈卓盈這位「多功能老婆」，當然錫到燶，見到老婆辛苦做完家務，他會識做為太太按摩放鬆，「佢見我太攰會幫手做，都有同我按摩吓，兩樣都有。」她大讚老公夠體貼，那會值多少分？「佢算高分，我驚佢驕傲，如果有加有減，100分滿分，我暫時會畀佢90分，有10分進步空間，慢慢加上去。」
禮物講心意
今日聖誕節，沈卓盈首次以人妻身份度過，加上離開無綫後工作量大增，今年買給親友的聖誕禮物稍為「加碼」，她說：「呢幾日我忙完，有時間去買禮物喇。送禮物係心意，我鍾意揀啲啱用嘅禮物送朋友，就算畀多少少錢，啱用都值得嘅。」她早已購了一份實用聖誕禮物給老公，但未有特別期望收到甚麼，「每年都係我送出多，好少會有回禮，我送嘢畀佢哋，佢哋開心我咪開心。」她試過收到胞姊的洗潔精和毛巾禮物，「可能我同家姐都好實際，唔諗無謂嘢。」
問到何時造人？沈卓盈謂生仔計劃順其自然：「生小朋友都講緣份，要嚟始終要嚟，我哋冇話指明幾時要生要幾多個，到時先算，冇特別諗，總之我哋心態都鍾意小朋友。」
場地提供：RedMR