今日係聖誕節，無數香港人嘅聖誕同新年願望簡單一致：五大訴求，缺一不可；光復香港，時代革命。
《蘋果》副社長陳沛敏收到「影攝食」來信同佢親手畫嘅兩張聖誕卡，其中一張寫畀今年2月時、《蘋果》報道過患咗罕見兒童癌症而準備去台灣接受治療嘅4歲女孩童童，影攝食祝佢健健康康，同時批評政府只亂起大白象，卻忽略一班弱勢小眾，而陳副社已託人將張聖誕卡轉交童童同佢家人。
另外一張聖誕卡，影攝食就畫畀所有記者，多謝大家恪守天職報道真相，冇因為政權同魔警打壓而退避，仲鼓勵大家要繼續將真相向公眾呈現，「不偏頗、不歸邊、不向惡勢力低頭」！佢形容今年聖誕係年輕人用血肉長城換回嘅短期曙光，講明自己會同所有年輕人為香港未來而戰，「永不與年輕人割席」，而除咗五大訴求呢啲最基本卑微期許，影攝食仲一樣要求重組警隊，同時爭取要改善囚權。
收押所義士︰見到溫暖同希望
影攝食喺來信中，引用大文豪狄更斯名著《雙城記》經典名句，雖然佢因為政權逼迫、政治檢控而失去自由，但字裏行間仍然語重心長奉勸政權聆聽香港人嘅心聲，唔好將「珍惜香港，共建家園」當口號，否則只會令香港變成抗爭之都。
其他在囚抗爭者都同樣有家書畀香港人，立法會議員邵家臻噚日亦喺fb上載咗封由荔枝角收押所寄出嘅來信，義士話呢個聖誕係回歸以來最黑暗硂最哀傷，但因為收到好多聖誕卡，變得有希望同溫暖，仲強調唔會放棄抗爭，同時寄語大家唔好再同佢哋講對唔住，因為對大家唔住嘅係政府。
李八方