聖誕節臨近，近排有唔少「和你shop」抗爭行動，但商場喺聖誕檔期唔開門做生意，就會損失巨大，不過又驚有「裝修」發生，有商場就諗咗條絕世好橋，務求減低風險，點知轉頭已經成為抗爭新元素。
呼籲一人一鎖寫願望
事緣沙田新城市廣場曾經因為畀防暴橫行打市民，搞到變成「新城市戰場」，早前商場四樓部份欄河玻璃一度被破壞，然後又有防暴警入商場搜捕。近日商場就將大量玻璃欄河甚至門口高度設防，全部換上鐵網再加透明膠板，連登仔就恥笑話呢個工業風令商場變咗「新城市工場」，甚至話搞到商場變「新城市監倉」。
商場無啦啦多咗呢啲「藝術裝置」，自然係網民同抗爭者發揮創意嘅好機會，呢啲鐵網似足法國巴黎心鎖橋嘅場景，網民所以發起今日去新城市廣場，實行一邊「和你shop」同時「和你鎖」，提議大家一人一鎖寫低聖誕願望，但八方就唔希望同時呢個心鎖欄河，同巴黎條橋一樣難逃被拆走命運。