【金鐘】劉鑾雄（大劉）係手袋名牌Hermès嘅VVIP，2016年有報道指貴為劉太嘅陳凱韻（甘比）家中擁有超過700個呢個品牌嘅手袋，而甘比媽咪都係捧場客。日前《蘋果》就直擊甘比去金鐘太古廣場嘅專門店瘋狂shopping嘅情況。
逗留約40分鐘
當日大概下午兩點，甘比帶同一名保鑣急步行入專門店，喺店內一處隱蔽位置逗留約40分鐘，原來佢大手購物，保鑣仲誇張到要分三次，先至攞晒所有戰利品返上甘比嘅七人車座駕。
保鑣身形結實，不過佢第一轉雙手托住禮物盒，行去上一層嘅上落車處，竟然顯得有啲吃力。隔咗15分鐘後，佢再次返回店內拎第二轉，今次佢就拎住三大袋購物袋離開，又用咗15分鐘，先拎到上車再折返專門店。最後一次，甘比終於現身同保鑣一齊走，今次保鑣一隻手拎住一大個橙色購物袋，另一隻手就拎住蛋糕店嘅大紙袋，而甘比就拎住一個小型嘅橙色購物袋。
職員送出門口
甘比身為貴賓，當然享受到尊貴待遇，佢同保鑣行出專門店門口時，職員親自歡送，之後甘比同保鑣一齊行去上車。
估計甘比今次瘋狂掃貨，都係手袋居多，而呢個品牌手袋起錶價近十萬港元，甘比今次shopping大有可能用咗七位數字，未知佢臨近聖誕節大手入貨，係唔係買嚟當聖誕禮物送畀朋友呢？