【黑鏡線索】
上次講到，中國以前畀大家嘅印象，係世界工廠，好專心咁出口成品到世界各地。但係近年就開始好高調咁，想出口埋極權意識形態，例如NBA事件、Blizzard事件、收買西方政客等等。問題係，本來以前好哋哋，咁係咪中國政權近年忽咗？
拉長啲睇，歷史上，中共曾經超過一次逆轉勝。第一次，係對付國民黨。曾幾何時，中共只係依附喺國民黨裏面嘅一個組織，中共元老好多都係國民黨員，周恩來當年係蔣介石喺黃埔軍校時代條𡃁。蘇共培植嘅，原本係國民黨，孫中山臨終前將國民黨交託蘇共，國共本來就同枝，共係隻寄居蟹。
外圍切入 扮𡃁鬥大佬
奇就奇在，搞咗一大輪之後，二戰打完，竟然係中共趕咗國民黨去台灣，本來嘅弱者，打贏咗原本嘅強者。當然中間有各種原因，總之中共有方法，槓桿國民黨資源，喺外圍切入，建立出自己嘅勢力範圍，所謂農村包圍城市，做咗中國內戰嘅最後贏家，條𡃁搞掂咗大佬。
第二次，係對付蘇共。稱霸中國之後，喺國際上，跟嘅大佬就係蘇共。中共槓桿咗好多蘇共嘅資源，咁當然呢啲嘢事後就唔再點提。之後中共就開始挑戰蘇共喺國際共產勢力嘅領導地位，喺蘇共唔太理會嘅範圍，例如非洲、東南亞，喺外圍切入，又同美國結盟。搞咗一大輪之後，到咗90年代，先冧檔嘅，竟然係蘇共。再一次，鬥長命，條𡃁鬥贏咗大佬。
中國經美國引薦，入咗世貿，美國期望，入世後嘅中國，假以時日，自然會融入自由世界文明體系。中共槓桿咗好多美歐日嘅資源，發展到世界排第二嘅經濟體。咁之後發展會係點？中國真係做個文明國家？抑或喺強者唔太理會嘅範圍，例如一帶一路，喺外圍切入，挑戰美國地位，喺「華盛頓共識」之外，建立平行嘅「北京模式」系統，嘗試第三次，終極一次，以弱者姿態勝出？
先認契弟 再反轉豬肚
中國政權嘅目標，係put China back to its rightful place，即明清朝貢系統，「天朝」嘅位置。目標冇放棄過，扮friend、認契弟、妥協、忍辱負重、權宜之計、韜光養晦，最終反轉豬肚，只係時機問題。當然時機嘅拿揑係好重要，近年中國自覺經濟站起來，科技經過咁多年偷呃拐騙，5G、AI、五毛、黑客技術，又自覺已經係企喺時代嘅尖端，趁住國際社會仲係禮禮讓讓之際，唔難理解，點解有人覺得係時候出擊。
但係美國忍得幾耐？當年共產主義開始蔓延，美國國內馬上釋出抗體，不惜以麥卡錫主義，重藥對抗病毒。如今美國覺醒，民意大多數反中，一下子由奧巴馬年代，鐘擺到連Trump都俾人鬧係鴿派嘅時勢，吹雞叫自由世界盟友一齊出手。香港人喺呢個世界重要關頭，喺反送中嘅時代革命裏面，用抗爭用選票，堅定確立自己企喺自由世界文明嗰邊，企喺say NO to China嘅最前線。Hong Kong matters more than ever。
撰文：宋漢生
fb : sunghsblog