謊話連篇嘅無恥Popo過去半年濫暴兼濫捕，搞到唔少愛香港嘅示威者被捕或扣留而失去自由，今年唔少人嘅聖誕願望都係想「手足平安」，同時亦都令今年佳節時難言歡欣，但就繼續抗爭，發揮創意將抗爭訊息結合節日做文宣。
其中網名「晴天林」嘅80後獨立音樂人，就製作咗首《黑色聖誕Medley2019》嘅聖誕歌，講明「聖誕Party減壓必備」，實情首歌由好多首大家耳熟能詳嘅聖誕歌改詞而成。打頭陣係由《Joy To The World》改成嘅《唔當差》，第一句歌詞單刀直入「香港警察 仆街衰格 亞洲最佳垃圾」，係咪有聲呢？學Popo話齋，正面去睇，講緊Popo有改進空間，就算仆低都可以爬起身，做垃圾都係亞洲最佳，完全係勵志故事囉。
連儂牆現「連登戰隊」文宣
呢首應節歌Popo被人由頭唱到尾，之後嘅《呢班黑警正垃圾》（《Hark! The Herald Angels Sing》）同《鄧炳強is Coming to Town》（《Santa Claus is Coming to Town》）都圍繞佢哋嘅惡行，中間就穿插講何君堯嘅《何君奶隻鵝》（《Jingles Bells》）、《和理勇武》（《O Christmas Tree》）同《冚台橙》（《We Wish You a Merry Christmas》），而結尾一句「Glory to Hong Kong」，應該係大家心聲啦！
除咗有聲，仲有埋色，八方仲見到唔少黃店提供多款好靚嘅抗爭聖誕卡，社區連儂牆仲出現巨型「連登戰隊」聖誕文宣，雖然呢啲文宣未必留到聖誕，但希望大家一定要記住「五大訴求，缺一不可」呀！
李八方