【光復區會】
【本報訊】「陳梓維」這個名字在區議會選舉後，因擊敗葉傲冬當選而瞬間走紅。參選時被人看低一線的陳梓維，自言比對手沒有優勝之處，且「真係冇諗過會贏到」，當選歸功於反送中逆權運動，激發300萬港人出來投票，表達對政府的不滿。他稱上任後會實現競選承諾，爭取成立還原8.31港鐵太子站警察無差別襲擊事件工作小組，「始終港鐵一日未公開閉路電視，根本有好多事係一個疑問，會要求港鐵交代」。
記者：張文鈴
如果說人生是一場比賽，陳梓維出身基層家庭、會考零分、毅進肥佬，早就輸在起跑線上。今次反送中運動成就他當選佐敦南區議員，當選翌日網民對其外貌惡意攻擊，「（網上）啲人話我弱智，我都唔評論啦，清者自清，雖然我喺電台（節目）上否認過，其實否唔否認冇所謂，識得我嘅人就知我性格」。他承認這些攻擊令他感到不快，「你話唔開心就總有啲㗎啦，咪由佢講，過咗一排冇新聞價值就唔會講」。
陳梓維別樹一格，不僅見於談吐，也見諸其手寫政綱。他解釋，競選團隊中無人有修圖軟件，而有感單純手寫「比較沉悶」，因此加入星星「design（設計）下啲得意啲」。他笑說：「有人提議我（手字）設計揮春，但睇情況啦。」
不擅辭令 「講錯嘢好大鑊」
記者訪問陳梓維之前，看到不少網民對他的評價，包括不擅辭令、「毒男」……真人見面時也的確有此感覺，但更多的是其赤子之心。他解釋，「點解我成日咦咦哦哦呢，最主要係我驚講錯嘢，有啲嘢你講錯咗係好大鑊，所以講嘢要好慎言」。記者問他是否從小到大都是這樣性格？他說：「真係唔知喎，因為冇接受太多記者訪問，我唔知我有咁嘅情況，同朋友傾偈就少有呢啲（支支吾吾）情況。」有人擔心他能否勝任區議員一職，他這樣答：「服務社區重點係改唔改善到個社區，而唔係區議員本身個人問題，行動最實際。」
90後的他，非因反送中浪潮才投入社會事務。多年前政府廢除會考制度，以中學文憑試取代，陳梓維當年也有參與中學生聯盟發起的反對行動。相隔多年，他就地區議題向葉傲冬討教，換來一句「跟政黨意思去做」激發他參選，「真正嘅區議員係要捍衞居民利益同立場為先，最起碼我係願意捍衞街坊立場」。
他計劃每月召開居民大會收集意見，「唔係好似以前啲區議員，街坊啲諗法係點，唔係選完就冇咗影」。區內長年已久的環境清潔、違泊等問題是他上任後要處理的工作，亦會實現競選承諾「爭取成立8月31日太子站還原事件真相工作小組」，「雖然有媒體報道過，但始終港鐵一日未公開閉路電視，根本有好多事成一個疑問，會要求港鐵交代」。
