今屆意大利超級盃星期日喺沙地阿拉伯舉行，結果拉素繼月初嘅意甲以3:1破咗祖雲達斯金身，今場再次以3:1擊敗祖記奪冠，而祖記球星基斯坦奴朗拿度（C朗）更加係近六年嚟首次喺決賽輸波，難怪佢賽後黑晒面，頒獎禮即刻除低個銀牌落嚟唔想要。
祖記又輸1:3畀拉素
祖記雖然係「意甲山寨王」，不過拉素近期表現亦好凌厲，聯賽八連勝之餘，月初亦曾經以3:1打破咗祖記嘅不敗身，今次意超盃繼續剋住祖記。祖記今場鋒線派出C朗、希古恩同保羅戴巴拿，星味夠晒勁，不過竟然係拉素喺17分鐘由路爾斯阿拔圖先開紀錄。祖記要等到完半場前由戴巴拿門前執雞扳平。
換邊後祖記無以為繼，拉素喺73分鐘再由魯歷接應馬高柏洛路嘅頭槌二傳門前掃入成2:1。祖記喺補時3分鐘仲有中場賓坦古亞2黃1紅被逐，結果一分鐘之後就畀卡達迪喺禁區頂主射罰球破網，鎖定3:1勝局，拉素繼2017年後再次擊敗祖記捧走意超盃。
文迪蘇傑去卡塔爾掘金
其實C朗今場都踢得相當積極，全場有五次射門，而且祖記今場唯一入波佢都有份間接助攻，可惜最後功敗垂成，贏唔到佢個人第30項球隊錦標。翻查紀錄，C朗上次喺決賽輸波已經係13年嘅西班牙盃，當時佢所效力嘅皇家馬德里喺決賽以1:2輸咗畀同市宿敵馬德里體育會。之後嘅6年C朗踢過14場決賽全部贏晒，包括14、16、17同18年嘅歐聯決賽，同埋佢喺16同18年為葡萄牙贏得歐國盃同歐國聯等。
C朗一向喺球場喜怒形於色，今場賽後都難掩失望心情，佢係拎完銀牌後，即刻將頸上嘅銀牌除低，睇嚟佢都係接受唔到做「阿二」。另外，祖記前鋒文迪蘇傑日前就被發現喺卡塔爾出現，盛傳佢好大機會加盟當地班霸艾杜哈尼，聽講佢之後嘅人工仲會比喺祖記嗰陣嘅600萬歐元更高。