已經視法律如無物嘅香港Popo，剛過去呢個周末，又再通街打人打記者務求搞亂香港，嚟緊聖誕節，市民大條道理出街，Popo就當然唔會放過呢個可以肆無忌憚傷害市民嘅大好機會，而且仲厚顏到喺fb專頁出帖，話「其實大家都想平安共度佳節」，然後扮一對情侶對話，當其中一方話驚香港近日咁亂，另一方就叫對方「唔使擔心」，因為香港警察會「保護」佢哋喎。
警察保護市民天經地義，但加咗香港兩個字喺前面，就應該變成否定句囉，唔信？睇吓星期六喺元朗形點商場發生嘅事就一清二楚，當時一班蒙面green objects喺商場橫行，有中年男士避走一旁，但行最前嗰個「恐怖分子」竟專登挨斜個身，大力撞呢個市民，仲撞人先告狀，喝罵市民「做乜撞我」，唔通呢個行為，就係警察示範緊保護市民嘅方式？
出完聖誕post，Popo噚日下晝又再挑機話「冬至，平安至」，仲出圖列出宜忌，包括宜平安、慶祝、守法同和家人團聚，以及忌破壞、堵路、縱火同使用暴力，然後仲落埋個「向暴力說不」hashtag。香港人就一直同咗警暴說不好耐，但班警察又聽咩？八方就睇番真通勝，冬至呢日實情宜拆卸、修造，唔通連個天都暗示應該「裝修」？但大家要留意呢日同時宜捕捉，所以真心希望抗爭者平安呀！
李八方