幫英格蘭喺1966年捧走世界盃嘅名宿馬田彼得斯，上星期六證實與世長辭，享年76歲。職業生涯大部份時間效力韋斯咸嘅前英格蘭中場馬田彼得斯，人生最高榮譽就係幫英格蘭喺66年贏到世界盃，佢嘅家人上星期六證實佢因病離世，而韋斯咸都發聲明哀悼。彼得斯係66年傳奇三獅兵團中第5位離世嘅球員，另外四人分別係阿倫波爾、雷威爾遜、哥頓賓士同卜比摩亞。彼得斯效力韋斯咸11年後，喺70年加盟熱刺，成為首位轉會費達20萬鎊嘅英國球員。成就方面，除咗幫英格蘭奪得世盃，仲幫韋斯咸喺65年贏得歐洲盃賽冠軍盃，72年幫熱刺稱霸歐洲足協盃，同兩座英聯盃錦標。