記者G早年移民美國，曾在東西兩岸工作十數年，取得美國籍後，碰上911恐襲事件，美國反恐部門對外籍人士，特別是膚色稍黑的，經常特別注視，記者G於是舉家回流，今年碰上反送中運動，記者G被建制派視為深黃，高官曾對他「面斥不雅」，加上工作單位業務不景，反正已達退休之年，於是傳出再「移民」回美國的念頭。星期五午飯，碰到記者G，想起傳言，於是問他何時起行返美國，記者G答：「諗吓都唔得咩，未有最後決定，上個月去台灣幾日，發覺言論十分自由，生活費又便宜，移民台灣都幾好！」揸美國護照，移民台灣，有乜嘢手續？記者G答：「唔駛辦咁多手續嘅，美國人可免簽證到台灣住六個月，期滿返香港度周末，再返台北，又可以住六個月，好簡單，我又唔打算喺台灣搵工作，純粹退休讀書聽音樂會，最緊要租金便宜，生活費唔貴之嘛。」
咁又諗得過噃，但怕唔怕習近平要樹萬世功業，強行攻台、統一台灣呀？記者G諗咗一陣，答：「我冇認真想過呢個問題，北京會否攻打台灣，要睇好多因素，最重要係美國反應。我有同學住咗美國三十年，係大學教授，佢最近同我通訊時講起，特朗普分化美國，一半人支持佢，一半人反對佢，但佢嘅鐵票多，夠穩陣，明年照計可以連任，有佢響度，美國對中國政策不會手軟，同學話特朗普睇銀紙多啲，民主黨睇人權自由原則多啲，即使民主黨入主白宮，對中國更加強硬。今時今日在美國參眾兩院，雖然兩黨打大交，但一講到中國，兩黨就意見一致。我個仔在加州讀完大學嘞，據佢報道，自NBA事件後，美國大學生及年輕人對中國日益反感。台灣在華盛頓求助一味打民主牌，打自由牌，係有聽眾㗎，習近平攻台，美國自然有反應啫！」
估唔到講兩岸政治會扯上NBA，可能北京都知道踩親美國普羅大眾，最近已經盡量少提。記者G話：「美國普羅人民對台灣、香港在地球那一個位置，大都矇查查，但一講到言論自由與NBA，就人人有認知，全無例外，中國封殺NBA火箭隊總經理令美國大學校園都一片f×××，對北京增加討厭感。美國大學生其實已唔多講外交政治，但NBA事件又激起佢地反華聲音！」中國大概冇乜研究美國民情嘅專家，又或者有都唔敢出聲，於是發生目空一切之反NBA事件，點知道竟會影響到美台關係！