返咗去阿積士踢波嘅前曼聯左閘戴利白蘭特，被診斷出心臟有問題。阿積士證實呢位荷蘭國腳將要接受治療，會缺陣一段長時間，隨時要提早掛靴。29歲嘅戴利白蘭特喺本月阿積士不敵華倫西亞嘅歐聯賽後覺得頭暈，及後接受檢查發現患有心肌病，嚴重可能會導致失明。阿積士已發出聲明證實消息，指佢會接受治療，喺心臟裝上皮下植入式除顫器，歇冬期會繼續休養同覆診，亦明確表示球隊下年一月開操唔會預佢。白蘭特隨後都喺ig感謝各界關心，話會努力復原，希望再喺球場上同球迷見面。佢個po有唔少球員讚好同鼓勵，包括拉舒福特、連格、馬菲斯迪歷特同迪比等，都有留言支持佢。