宋熙年最近過檔香港開電視主持資訊節目，要喺日本東京介紹當地嘅居住環境同樓市行情，佢亦因為咁對東京加深咗認識。宋熙年話日本人好守護自己嘅文化傳統，所以如果要喺當地租樓，並唔係件易事，日前佢受訪時話：「想喺日本租層樓住，如果冇公司聘請，或者冇詳盡嘅資料，係唔會咁容易畀你租到樓。喺日本嚟講，買樓係容易過租樓，作為一個投資，佢哋係OK。」
拍攝時宋熙年仲走訪過日劇天王木村拓哉嘅寓所，覺得好興奮，佢話：「我哋去咗目黑區，好多製作人公司、廣告公司、模特兒公司都係開喺目黑區，亦都係木村拓哉住嘅地方，佢屋企叫木村王宮，係個唔知幾多千呎嘅屋。」
被老公打窒
木村拓哉為免個人私隱暴露，向Google申請將自己住處隱形，宋熙年原本都冇預計會經過木村王宮，但出路遇貴人：「有好多資深嘅經紀或者老街坊，佢哋淨係透露咗畀我哋知道喺邊條街，我哋行過就會知道係邊間屋，因為有個氣勢，我哋就路過佢屋企嘅前門望吓，係好宏偉，冇乜窗。其實我唔係木村fans，唔知點解會好興奮，變咗小粉絲，控制唔到自己。」問到目黑區樓價，佢話：「我最鍾意一個800幾呎、大約500幾萬港元嘅複式單位，相隔木村屋企只係兩條街，但木村屋企係大約二億港元。」
開到有冇心郁想買？宋熙年笑話：「有心郁郁，我真係有打畀老公，同老公講格局幾好，隔籬又係木村住，成個區好潮。佢問我係咪想買，我嗰刻就收番少少，因為我始終唔係太熟識日本呢個地方，又唔識日文，所以投資去日本，我始終保守啲，但係好吸引。」宋熙年坦言如果要喺外地置業，首選都會選擇澳洲悉尼或英國。
撰文：馮仁昭
化妝：Sammy Lam
髮型：Nicole Yip@ii hair & nail
服裝提供：IRO
場地提供：The Stadium