上星期六喺國際米蘭以4:0大勝熱拿亞嘅比賽首獲正選嘅施巴斯坦艾斯普薛圖，獲盧卡古讓射12碼而拎到意甲首球，以17歲零172日成為自1958年嘅哥素以嚟，幫國際入波嘅最年輕球員，賽後佢將呢個入波獻畀喺看台上觀戰嘅阿媽，又讚揚盧卡古係好出色嘅人同非凡嘅球員。國際喺呢場比賽嘅下半場獲得12碼，原本係劊子手兼已經有一球喺手嘅盧卡古，將個波交畀首次正選上陣嘅施巴斯坦艾斯普薛圖，後者不負所託操刀射入，幫國際領先至3:0，並超越巴洛迪利（17歲零237日）成為喺意甲為國際入波嘅第二年輕球員，盧卡古亦善有善報，喺尾段梅開二度，幫國際贏4:0。