噚日係冬至，亦係擔任港台節目《城市論壇》主持嘅蘇敬恆（蘇B）第200次主持城壇，所以蘇B趁佳節派200粒黑白湯圓，同大家開心share，不過就遇到綽號「龍心」嘅網絡紅人林克霖贈興，仲一度爬上大台後嘅大樹，搞到現場直播緊嘅論壇都要一度暫停。
冬至加上臨近聖誕，喺九龍城賈炳達道公園舉行嘅《城市論壇》現場都加咗裝飾，好有節日氣氛，喺節目正式開始前先搞個湯圓宴，嘉賓之一嘅香港眾志周庭話，冬至最緊要團圓平安，又話香港人已經俾娥特搞到好團結，希望777可以認真聽聽民意，但有獲派兩粒湯圓嘅台下觀眾話市民要求五大訴求，兩粒湯圓唔夠皮，蘇B就叫大家隨便添食。
論壇去到半場，場外響起國歌，原來係一身Black Bloc嘅龍心用私家擴音器播歌，仲爬上樹躲避工作人員嘅勸阻，之後仲爬上一條比較幼嘅樹幹，幾乎喺講台上嘉賓頭上，逼到蘇B要叫停，不斷勸龍心返落嚟。面對龍心發言要求，蘇B邊講「得、得、得」，邊請工作人員請佢坐低飲啖水，最後擾攘咗幾分鐘，嘉賓總算可以繼續發言。