【白色恐怖】
【本報訊】中國國家主席習近平南巡，中港澳三地加強安檢，不少港人都被拒入境澳門及內地。有讀者向本報報料指，最近續期回鄉卡時被無理拒絕，甚至因認識一位泛民政治人物而被起底，過關時被留難，扣留數小時，嚴重影響北上工作。中共一方面宣傳大灣區有多機遇，要港人認識中國，但另一方面打壓香港人北上自由，有立法會議員直言中共正「拒絕緊200萬港人」。
廣告人的陳小姐（化名），今年8月北上過關時的經歷令人感到白色恐怖籠罩，她說：「入境時被叫入房扣查，房內見到好多後生嘅香港人等候，然後一個個被帶入房，到我入房時就先查我手機，要我刪除遊行照片同VPN App，之後個官員就問我識唔識某一位政治人物，我就答『識但唔係好熟』，之後佢望住電腦，好冷靜講，『某年某月某日有個聚會，有幾個人，你都有出席，你哋應該係好朋友！』」
男子續領回鄉卡被拒
陳小姐對於內地官員詳細掌握她的私生活感到十分震驚，最後只能承認，更被迫簽下悔過書，承諾以後不做危害中國及香港的事，包括不參加遊行。
被扣留兩個多小時後，陳小姐驚惶失措離開，事後她向該聚會的參與者查問，有沒有公開該聚會的照片，但全部確認沒有上載任何照片到社交平台，「其實咁就更加恐怖，完全唔知佢哋點知個聚會情況」。
另一名同樣從事廣告業的讀者黃先生（化名）30歲左右，今年8月時曾到上海，當時入境尚算順利，「當時成功過關，純粹問過我點解咁耐冇返大陸，𠵱家又返嚟，其實我都係幾年冇返箒」。
直至近期，黃先生要再到深圳工作，但回鄉卡已過期，於是申請快證續期，「畀咗600幾蚊整，攞證當日自助機出唔到張卡，要去櫃台問，最後話原來唔批張證，退返錢畀我，但要收我150蚊手續費。我問職員拒絕原因，佢就答我話『我都唔知，係當局唔批畀你，如果你要問，可以寫張聲明書，不過答唔答係佢嘅自由』」。黃先生只能無奈離開。
黃先生雖然有參加大型示威遊行，後期亦有幫忙支援抗爭，例如派文宣、做哨兵等，但由始至終他沒有被捕，亦未曾被警截查抄身份證。「我唔算好前線，就算做哨兵都係中間或後面做backup，企喺側邊街坊咁，好多時連gear都冇。」他認為於這個敏感時期，某一個年齡層的人都篩選不批。
楊岳橋：國安疑跨境執法
立法會議員楊岳橋對上述兩個案感到十分震驚，尤其國安似乎已跨境在香港執法，竟對泛民政治人物，以及其身邊朋友偷聽甚至追蹤，這是完全超越法規的行為，「如果一個身家清白嘅人，尤其係和理非你都要斷然拒絕，其實你係拒絕緊200萬港人，甚至更多。中共一方面宣傳大灣區有好多機遇，另一方面打壓香港人北上自由，係散播緊白色恐怖，令經常來往中港兩地嘅人擔驚受怕，同埋畀緊壓力啲僱主」。