上星期六嘅西甲聯賽，巴塞隆拿喺主場以4:1輕取艾拉維斯。呢場係巴塞喺2019年最後1場波，佢哋將會歇冬小休兩星期到明年初再戰。美斯喺今場波為巴塞攻入第三球，亦係呢位阿根廷球王喺2019年球會入面，加埋國家隊入波嘅第50球，近10年第9次可以喺單年累積入至少50球，成就認真非凡。
12年入91球破世界紀錄
美斯喺過去10年，只有13年入球總數冇達到50大關，當年差五球先至達標；最誇張嘅係喺12年，全年入咗91球打破世界紀錄。32歲嘅美斯今年嘅狀態唔算係最巔𥧌，但總算喺年尾先後擸晒國際足協年度最佳球員同金球獎兩大個人殊榮。上星期六主場迎戰艾拉維斯，巴塞喺上半場先後由基沙文同維達爾各入1球領先2:0；易邊後客軍喺56分鐘追番球至1:2，到69分鐘美斯為巴塞再拉開比數，接應好拍檔蘇亞雷斯嘅傳送，喺4人包圍下都能夠喺離門20碼快射，彎過門將貼柱入網，單年50球成就又解鎖。
美斯又到達50球里程碑，但今場波表現最好嘅應該係另一巴塞前鋒阿蘇，巴塞頭三個入球都係由阿蘇交靚波造就隊友建功，貢獻完助攻帽子戲法之後，佢再喺75分鐘主射12碼射成4:1埋齋，3傳1射。教練華維迪賽後例牌又大讚下美斯：「有美斯就係我哋嘅最大優勢，喺需要佢嘅時候佢就挺身而出，攻入一球令我哋唔使再受壓。」
羅拔仔今年入波最多
美斯今年入球雖然多，但原來佢並唔係19年歐洲球壇最多產嘅射手；喺今季入球如麻嘅拜仁慕尼黑前鋒羅拔利雲度夫斯基，今年為拜仁同埋波蘭國家隊總共上陣58場入咗54球，力壓美斯。德甲聯賽都啱啱歇冬，拜仁喺上星期六進行2019年最後1場比賽，主場迎戰禾夫斯堡，踢到下半場尾段，先由00後小將約舒亞舒克斯喺85分鐘破蛋，4分鐘後由基拿比奠勝贏2:0。羅拔仔喺呢場波踢足全場雖然冇波入，但基拿比奠勝一球係由佢助攻，一樣有重要貢獻。另外，拜仁星期日宣佈暫代教練費歷克會教到季尾。
