劉心悠前晚與趙慧珊（Aka）、張新悅及方健儀等，到尖沙嘴文化中心出席經典芭蕾舞劇《胡桃夾子》開幕夜。露臍又晒腿現身的劉心悠，早前因拍攝黃子華執導的賀歲電影《乜代宗師》，扮演一名拳手，為了增肌要吸收蛋白質，結果體形壯實及皮膚也曬黑了。她笑說：「你哋覺得我大隻咗咩？我覺得自己細隻咗。」
劉心悠續說：「我人生第一次咁做，train咗幾個月，仲要曬黑，都係為咗個角色。我自己都接受到黑嘅，因為平日練跑都會曬到有印，但係曬燈就平均啲囉。」她又表示練拳時經常被人打：「成日都被人撼頭，第一日輕輕被撞已經流晒眼淚，其實都係要練大個膽，日日都好過癮，好似搭船咁。」對於首次與黃子華合作，她直言覺得很開心：「佢好關心打拳，仲分享好多打拳嘅嘢畀我，叫我睇多啲新聞了解吓，我諗佢想我快啲投入角色。」
Aka跌瘀面
此外，Aka左面頰帶有瘀傷，她表示早前到森林拍攝新歌MV，時值凌晨，四圍環境漆黑一片，其間不小心摔倒，她說：「拍攝時可能騷擾到附近民居，有警察到場了解，當時好心急，想快啲拍完。」她又指自小學習芭蕾舞，曾經因跳芭蕾舞受傷，左腳筋發炎，服了很長時間的消炎藥。她又透露每年聖誕節都會欣賞《胡桃夾子》，她說：「自己都有參與過演出，大約12、13歲嗰陣，我有做唔同角色，記得扮老鼠要戴頭笠，有中暑感覺。」
採訪、攝影：盧妹