【爆相爆片】陳樂（Justin）現年18歲，是ViuTV節目《全民造星II》B4組合中年紀最細的參賽者，上星期日決賽雖然三甲不入，但就獲當晚評判林珊珊、霍汶希（Mani）賞識，想簽他為旗下藝人。原來這位娛樂公司爭簽的小鮮肉，已經名草有主，前日有讀者目睹Justin與一名長髮少女在港鐵車廂纏綿，他旁若無人地跟女友摸手仔、咬耳仔，甜蜜到暈。
黐到實一實
讀者黃小姐透過《蘋果》的「爆相爆片」報料，指前日下午2時許在港鐵南昌站碰見Justin，當時他一身黑衣跟一名長髮少女坐在一起，態度極為親密，她說：「我有睇《全民造星II》，所以認得Justin，但車上其他人就似乎冇人知佢係邊個。佢哋搭車去東涌方向，兩個人又攬又拖手，有時咬吓耳仔，細聲講大聲笑，兩個都笑得好開心，但就見唔到佢哋錫錫。」
從黃小姐提供的照片和片段中，Justin跟女友十指緊扣，其間他又摸女友手仔，原來二人戴上情侶手𠼦，更細心研究情侶𠼦，之後女友整個人靠向Justin，二人有如糖黐豆，黐到實一實。
自言基督徒
Justin昨日在沙田出席床品品牌專櫃揭幕活動，他回應指與女友於賽前已認識，有指他已超越師兄姜濤成功有拖拍，他認為不可以比較。再問是否仍保留處子之身？他初時回應：「我覺得冇咁嘅需要囉！」後來，他澄清只是誤解問題：「呢個（處男）係個謎，但我係基督徒。」同場的B4隊友MC亦坦承自己亦有拍拖，認為冇需刻意避忌，因不會影響工作。
採訪：魯吉、盧妹
攝影：陳俊強