評級機構惠譽Fitch認真唔識do，習近平在12月18日到澳門巡視，參加澳門回歸20年慶祝典禮之前，突然在12月16日發表一份評級報告，將澳門信貸評級展望從「穩定」降至「負面」，原因係：博彩收入持續下降，作為特區政府的自治權受到侵蝕，與中國內地經濟、金融和社會政治的聯繫逐步增加。中央其實充份肯定澳門係乖孩子，聽話，嚴控傳媒，隨時不准「有嫌疑人士」如香港Now記者、南早記者、香港美國商會主席、香港立法會泛民議員等等人士入境，政治夠晒堅定。何物惠譽，竟然視之為「自治權受到侵蝕」，可怒也！阿仙奴球星奧斯爾夠膽講新疆，立遭央視封殺，台灣網紅波特王（台灣人）見蔡英文，稱呼她為「蔡總統」（唔通叫蔡小姐咩），立遭大陸贊助商刪片解約，之前又有NBA火箭隊事件，王毅（外交部長）與歐盟外交官員開會，「面斥不雅」，指責對方提起新疆及香港問題，凡此種種，皆顯示北京絕不容忍任何政治異見。今次惠譽咁唔畀面，向澳門派聖誕負面禮物，澳門政府及北京唔嬲就假，且看內地網民會否將Fitch改為Bitch！
中國目前雖然財雄勢大，互聯網科技（監控技術超一流）高強，但在國際文宣方面，到目前為止，完全佔唔到上風，在英語網絡世界，反而畀年青人久唔久就玩殘一次，例如一位阿富汗裔美國少女在TikTok暗射新疆，最近一位稱呼唐英年為姑丈嘅耶魯學霸郭佳怡（Stefani Kuo）拍一段短片更在世界華人網絡瘋傳，其中一句「China go ahead，我地唔怕死㗎」，更係金句。呢位郭小姐能入耶魯，已是中學尖子，入學後，由主修數學變成主修英文（耶魯英文系，常年排美國前十名），跟住又轉讀戲劇，揮灑自如，成績優異，直情係尖子中之尖子，加上佢姑丈之大名，竟然企硬捍衞香港，建制派當然震驚兼憤怒！事實上一啲廢老聲言放棄香港這代年輕人，但好似郭佳怡呢位生於1995嘅年輕精英，放棄佢當然係廢老之損失，唐氏家族之損失。六個月以來不少藍絲朋友常常講香港教育教壞人，要將兒女送去英國寄宿學校，由港大中大退學轉去英美澳加大學，理由係免得下一代受黃師教壞喎。哈哈，現在有郭小姐做人辦畀佢地睇，愈係叻仔叻女之年輕人，入到英美一流名校，愈是思想獨立，如郭佳怡，問啲藍絲家長驚未。一位藍絲朋友聲言送孫仔孫女入讀內地中學，他日最好考入北大清華，咁就係真正政治正確嘞，楊潤雄請注意及之，一於實行津貼所有高官子女返內地升學，完全取消公務員子女留學英國津貼！