「大俠」入行由低做起，做到今時今日終於捱出名堂，喺兩岸三地都非常吃得開。叫得大俠自然高大威猛，所以不乏靚女藝人親密朋友。人到中年，大俠反而娶咗圈外女友做老婆，可能同好多返內地發展嘅人一樣，過唔到女人一關。早年畀大俠搞大個肚嘅女藝人，佢哋年齡差30幾年，雖然最後係分手收場，但佢之後接咗兩母女嚟香港，咪睇大俠份人咁自我，佢好鍾意小動物，特別係狗狗。所以就算屋企多咗個小朋友，大俠繼續養狗，而且仲係一隻體重60幾磅嘅大狗。
喺屋企工人會好小心睇住狗狗唔畀佢接近小主人，不過出到街，大俠就少理，唔止冇戴口罩，有時仲會放繩畀狗狗周圍走。試過喺街因為狗狗太熱情，埋去哄一個小朋友，就嚇到對方媽咪即刻抱起個仔。由於大俠住嘅地方，嗰班鄰居都係有頭有面嘅人，所以搵業主立案法團出面同大俠商量，希望佢可以注意吓。可能大俠喺內地發展太耐，學晒內地人嘅習性，話隻狗係畜牲冇可能控制得到，仲同人講話見到佢隻狗，自己避開就冇事，又話隻狗有狗權唔戴口罩，激到成班鄰居紮紮跳。當然業主立案法團都醒目，直接搵大俠間屋嘅業主，業主已講明租約期滿就會叫大俠搬走，安撫眾鄰居。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。