世盃2010年最佳球員，曾經效力過港超聯球會傑志嘅前烏拉圭國腳科蘭，今年宣佈正式掛靴後，喺上周五踏入足球生涯新旅程。科蘭母會、烏拉圭老牌球會彭拿路宣佈，聘用科蘭接手出任主教練。回想近一個年代前嘅2010年世盃決賽周，除咗科蘭之外唔少都已經退出球壇，包括同樣喺當年入選最佳陣容、亦喺今年宣佈掛靴嘅另一名西班牙前鋒韋拿；至於喺該屆世盃賽事入最後一球，喺決賽加時絕殺荷蘭助西班牙封王嘅恩尼斯達就仲未言退，職業生涯由西班牙去到日本，下一站可能係南美洲，被傳會轉投阿甲球隊學生隊。
踢傑志半年後掛靴
現年40歲嘅科蘭，細個曾經喺彭拿路青年軍受訓，但好快已經離隊，直到15年先至再次加盟。到大約2年前嘅18年1月，科蘭加盟傑志效力咗半年，一直冇再簽其他球會，到今年八月宣佈正式退役。彭拿路喺上周五宣佈，請咗科蘭做球隊主帥，佢細佬柏保路會做助手。科蘭話：「可以喺彭拿路咁傳統而高水平嘅球會展開執教生涯，遠遠超乎夢想，被選中可以帶領呢支對我嚟講咁重要嘅球會，實在非常自豪。」
除咗南美球會同香港嘅傑志外，科蘭球員生涯踢過曼聯、馬德里體育會、維拉利爾以至日本大阪櫻花甚至印度球隊孟買城，足迹遍佈全球對佢嚟講係難得經驗：「走遍世界令我學識好多嘢，每個國家嘅足球特色，點樣去準備比賽，每隊唔同嘅戰術等，喺日本、烏拉圭或者西班牙都唔會相同。」
小白下一站學生隊？
10年世盃金球獎得主將展開教練生涯，至於九年前世盃決賽射入全場唯一入球，助西班牙首奪冠軍嘅恩尼斯達就仲未言退。現年35歲嘅小白，喺上年離開效力咗22年嘅母會巴塞隆拿轉投日職神戶勝利船，仲喺上周六日皇盃4強1傳1射助勝利船贏清水心跳殺入決賽，下年1月1號會同鹿島鹿角爭冠軍。
據報小白想尋求新挑戰，最近同阿甲球會學生隊傾緊，有意去阿甲搵食。學生隊喺今季阿甲目前位列中游，主帥米列圖喺球員時代曾經效力過巴塞，做過小白隊友，但因傷一直冇乜表現。