沙頭角鹿頸是港人假日遊山玩水的好去處，其中被稱為「車友飯堂」的發記士多更是地標之一，每逢周末均有大批電單車或汽車會友好來聚會。可是，老闆朱偉賢宣佈年底即將易手，原班人馬撤走，陌生人輪換上場重新經營，雖然奶茶比例量可以重新調配，餐蛋麵照舊現煮現賣，但人情還有餘溫嗎？
記者：莫問
攝影：司徒韋桐
市區茶餐廳與郊區士多茶座的最大分別，前者是日ABCD餐均是「光速餐」，那怕你食完一碗沙爹牛肉麵，湯未呷一口，便快速被夥計收走，生怕你多留一會；後者慢工出細貨，你坐上一個下午，不催也不趕人，位於鹿頸雞谷樹下的發記士多便屬當中表表者。
枱凳簷篷親手搭建
「我哋只有兩個爐，一個爐煮得一個麵，又唔會為咗快，煎定餐肉同蛋擺喺度。」發記士多每逢周末便高朋滿座，叫一個餐蛋麵一杯奶茶可能要等半小時以上，但食客並不介意，老闆朱偉賢笑言：「好多客坐成日，早上等一班朋友，下半場三點幾再嚟第二輪，一杯兩杯都係咁坐，識啲客咁耐，感情好似朋友咁咯……試過新年忙唔過嚟，有熟客幫埋我托餐出去畀其他客。」
這種默契不是一朝一夕產生，而是20年來聚沙成塔的因果，家中排尾二的賢叔，曾見證士多的黃金歲月。「阿爺70年代仲喺度賣緊柴米油鹽畀圍村，都有做小量街客或遊客生意，以前香港好多製衣廠，逢星期六、日，女工坐一車車旅遊巴嚟到燒烤，附近又冇超巿，每星期十幾盤汽水可以一次過清晒。」後期香港工業式微，加上圍村人口老化，單賣零食汽水及日用品難以延續，剛巧他99年經歷裁員，父親年紀老邁又苦無人接手，他決意做開荒牛，重新打造新士多茶座模式。
士多外的枱凳、有蓋鋅鐵的簷篷，均是賢叔一手一腳逐步搭建。「每逢颱風嚟到，漁護署唔要嘅木自己攞返嚟砌，一枱一凳都係我建造，後期先買膠枱凳。」至於手藝，賢叔笑言沖茶煮麵屬門外漢級別，多年來透過茶客試味逐步上手。「問吓批發商用咩茶葉沖奶茶，拎散茶不斷溝，開頭沖得冇咁好，啲客話唔夠茶味，大約一年幾就適應咗，後尾啲客話你杯奶茶掂喎，個人覺得好開心同滿足。」
年底易手淡然告別
發記轉型茶座的成功，還有先天幫助，發記門前大片空地，最多可泊二十至三十輛汽車，小徑靠邊臨海，可遠眺對岸沙頭角的景色，成為不少司機假日泊車吹風的聚腳地。
2000年起開始有車主相約發記，結果一傳十，十傳百，吸引車會組織聚會，細至車迷自發組織的Ducati電單車會、快意車會、三菱Evolution車會，大至香港汽車會，幾乎每逢周末輪流聚會，還要互相詢問檔期以免撞期，讓發記成為人所共知的車友飯堂。
賢叔已成士多靈魂人物，熟客已直呼他為「發記」，早已忘其本姓，但不忘其本心。有熟客讚許賢叔「就得人」：「舊時嚟到7點鐘仲未開門，其後我哋越嚟越早，老闆早上6點開門遷就我哋，𠵱家平均每星期都一次，打風落雨都入嚟坐吓。」然而美好總是有期限，發記士多今年8月突然在fb官網宣佈將12月29日定為最後一日營業，之後將會轉手，人面全非，消息一出，吸引不少新知舊雨到來捧場。
瘦田無人耕，耕開有人爭，賢叔道出現實：「老一輩起丁屋都係長子嚟繼承，屋契係佢個名，冇得拗。」眼見20年來心血從無變有，從有再突然消失殆盡，他沒有如電視劇《溏心風暴》家庭爭產風波，只有淡然與釋懷。「有兄弟爭嚟做，我唔會特登同佢拗，過咗年休息一陣再睇。」
製匙扣貼紙贈熟客
一班車友縱使不捨，但不得不接受現實，一身車手服、駕駛Ducati電單車到場的陳先生指七年前已開始光顧發記士多，喜歡郊外泊車易，老闆亦有人情味，「呢度坐一日都得，識朋友都喺度識，一兩星期至少出車一次嚟到，差唔多係指定動作。」
光顧16年的車主Jocky坦言：「講真發記食物款式唔多，味道OK，其餘都係食感情。食咗十幾年，好多回憶係陪我哋玩車時間長大，雖然好唔捨得，都冇辦法，事實係改變唔到。」他感嘆：「香港越來越向錢看，值得保留嘅事物或有風味嘅人與事漸漸消失。」
臨別依依，賢叔近月製作一批「發記士多」匙扣及貼紙送予熟客，又提供紀念橫額供客人簽名留念，他說希望在別處東山再起，「99年起剛好做咗20年半，梗係有唔開心，啲客問『你唔做我點算呀，每個星期六日我去邊呀』」近期他接連數晚均有車友邀請飯敍告別，傍晚未入黑便要趕緊收爐，他越過士多門前，兩邊各有一個舊雲石對聯，牢牢刻上「發圖忠厚能招天下客 記誠公心能取世間財」，一切盡在不言中。
港故事
有些人有些事，越是美好越留不住。本土手藝、傳統行業、街頭老店，都帶給我們生活的溫度和記憶的厚度，如果你知道有這樣的故事，歡迎提供。（致電或WhatsApp 6383 6568 註明「港故事」）。