警方前日在警總高調見傳媒，稱支援被捕抗爭者的星火同盟牽涉「洗黑錢」活動，拘捕三男一女，凍結7,000萬資金，引起全城譁然。杜汶澤昨日在facebook開火：「法律常識題，誠哥派錢，三唔識七，收錢嗰個算唔算洗黑錢？真心想知……」特首林鄭月娥丈夫林兆波在前晚澳門回歸晚會，當全場拍手大合唱《歌唱祖國》，他卻面無表情，阿澤也在fb嘲道：「究竟林兆波係咪自己人？好難講！冇錯，佢的確冇拍手冇唱歌，但另一方面，佢好可能係『全香港X林鄭X得最少嘅人』嚟喎！咁呢條數又點計先？」
秋生嘲警冇自省能力
另一邊廂，不平則鳴的黃秋生前日亦貼了一幅蒙面警的真實對話新聞，該蒙面警訓示傳媒話：「係咪記者朋友呀？影示威者啦，七個月喇，仲影警察執法。警察一定執法㗎啦！」秋生就在fb回應這位警察：「點解需要監察，點解需要獨立調查？佢講出咗個重點，就係七個月啦，佢都仲未明白人哋做乜影住佢，毫無自省能力。唔係影你執法，係影你有冇違法呀小朋友。」不少網民都留言支持秋生：「重點佢哋唔明，唔係阻止佢，係監察緊佢！」
撰文：翁可人