【爆相爆片】洪欣和內地男星張丹峰結婚多年，年初傳出張丹峰背妻出軌，搭上經理人畢瀅，令婚姻現暗湧，最後張丹峰箍煲成功，更豪擲150萬元買下一部名貴跑車冧老婆。跨過婚變危機，洪欣夫婦日前拍拖漫遊銅鑼灣，被本報讀者吳先生透過「爆相爆片」分享當時情況。
有傾有講
讀者吳先生接受電話訪問表示，當日下午約4時半，在銅鑼灣見到洪欣身穿T恤和牛仔褲，再拿着名牌手袋，和老公一齊行街，他說：「佢哋途經一間藥房，見到洪欣喺門外問咗店員幾句，之後佢哋去咗一間零食店，張丹峰陪老婆入去行咗一圈，其後自己走出門外食煙，洪欣一個人喺裏面慢慢揀糖。佢買咗袋98蚊一磅嘅軟糖，買完糖之後，兩個好恩愛咁向跑馬地方向走。」素顏的洪欣之後蹺着張丹峰的手行，沿路有傾有講，明顯已經走出婚變陰霾，享受平淡是福的生活。
洪欣在2004年拍攝視劇《我願意》時，認識比自己年輕10年的張丹峰。張丹峰主動表白及展開電話攻勢，成功贏得美人歸，對洪欣和前度所生的兒子，視如己出，婚後洪欣為張丹峰誕下囡囡張晞彤。去年網上瘋傳張丹峰跟經理人畢瀅以「情侶裝」出現，更有傳二人於同一個房間密會三小時，婚變傳聞不脛而走。洪欣出席活動時每提到「婚變」即收口，婉拒地說：「講緊啲咁開心嘅嘢，就唔好去問呢個問題啦。」到今年5月有網民在微博發佈了洪欣夫婦帶同女兒，一起到哈爾濱出席婚宴的照片，兩人於相中表現頗為親暱，消除婚變傳言。
採訪：皓騫
