富翁K於澳門出世，來港讀中學、大學，到英國讀碩士，現時擁有澳門身份證、葡萄牙身份證及葡萄牙護照，當然還有香港身份證，所以澳門年年派錢，佢年年得益，香港試過派錢，佢當然亦有份，葡國選舉，佢又有資格投票噃。昨日講到葡國選總統，佢事後（晚上）來電澄清：「我搞錯咗，其實係選國會議員，封通知函係葡文，我唔識睇，同你講完之後，話番畀我個仔聽，佢將我投票通知函用電腦做Google Translate，我先知道噏錯晒！」好彩左丁山因為未聽過葡萄牙有總統呢回事，上網查到10月6日係葡萄牙議會選舉啫！
澳門現在識葡語之人不多，1999以後甚少華人學生學葡語，葡萄牙人在澳門勢力式微，在香港葡萄牙人聲音更比1950~1970年代靜寂好多，那時候葡人代表有羅理基爵士、羅保爵士在行政立法兩局，香港奧委會有「沙皇」沙利士長期擔任主席，歌星有Joe Jr.，匯豐銀行有不少高中層葡籍經理級僱員，現在呢？大概只會記得中大權威歷史系教授科大衛、練馬師告東尼及匯豐香港總裁Diana Cesar。
中環雪廠街有西洋會所大廈，左丁山有一朋友測量師T係會員（娶咗葡裔太太），帶過左丁山上去食西餐，價錢便宜到難以相信，但生意幾靜吓，因為要係葡人先至入得會，現時會員頂多只有幾百，走一個少一個。左丁山都為西洋會覺得可惜，如此位置極佳會所，或恐後繼無人，真想話畀測量T聽，將之改組成為一個「歐盟會所」，准許歐盟成員國在港公民（當然冇英國人份）成為會員，包保會內西班牙、意大利、法國人雲集，成為香港最多元化國際化會所。改組自然有困難，因為西洋會所大廈已升值億億聲，講到錢就複雜了。
中央或者着眼於統戰葡語世界，純粹為了政治，故此搞澳門金融中心，竟然着眼於葡語國家企業。世界上最大葡語國家（前葡萄牙殖民地）係巴西，巴西曾有大型礦業公司在香港掛牌，因成交甚少，已退市。巴西有人口2.1億，其他多數係非洲國家，如安哥拉（人口2978萬）、莫三鼻給（人口2950萬）……全是窮國寡民，對中國戰略價值甚低，巴西已經係金磚五國（BRICS）成員，不須特別照顧啦！澳門倘若同葡語國家做生意，實在不是生意經，純是政治宣傳而已。為政治而不考慮經濟效益，乃北京決策之一個特色，習主席一聲令下，以舉國之力撐澳門經濟多元化，一定有一場虛火，橫琴島業主第一個受惠！