人人都想喺聖誕收到大禮物，唔知德國版《香港民主與人權法案》聯署達標，德方將會召開公聽會回應港人道危機，係咪都令大家喜出望外？
早前親身去過美國協助游說國會通過《香港人權法》嘅香港眾志秘書長黃之鋒，努力喺歐洲各國推動審議類似法案，早前就有身在德國嘅港人發起聯署，要求德國政府召開公聽會，回應係咪採取實際行動制止香港人道危機，包括推動德國版嘅《香港人權法》，眼見聯署未達5萬人嘅目標，黃之鋒日前就喺FB呼籲大家支持，為逆權運動注入新力量，結果聯署喺噚日（19日）下晝5點已有逾5萬人聯署，即係，得咗。
據知有關聯署由「一群居住在德國的香港人」發起，而聯署其實早喺9月23日已經開始，並喺12月25日、即係聖誕節截止，喺黃之鋒呼籲下，簽署人數日內急升，噚日就達標。睇返聯署嘅聲明，話香港警察暴力升級，「反送中」運動已經演變為一場人道主義災難，仲詳列7.21及8.31警暴事件。為保護在港德國人同德國公司嘅利益，以及維持呢啲歐盟公民嘅基本權利，發起人呼籲德國聯邦政府考慮採取多項措施，包括停止停止同香港警隊交流同合作、確認香港示威者受政治迫害及提供庇護途徑，以及凍結香港高級官員同親中議員於歐盟嘅資產，並且撤銷佢哋嘅歐盟公民身份。
訪德會面外交部長
其實黃之鋒9月訪問德國期間，都獲德國外交部長馬斯（Heiko Maas）接見，話感受到對方對港人爭取自由予以肯定，似乎德方都係stand with HK。嘩，如果聯署裏面嘅內容一一落實，加埋其他世界國家一齊推行法案，睇怕一眾特區官員同香港警隊都有排頭痕！
李八方