【爆相爆片】富商大劉劉鑾雄長子劉鳴煒今年初被爆暗撻細佢14年嘅中日混血兒兼無綫新聞女主播趙慧奈（Keina），不過10月佢哋就各自喺Ig暗示分手，Keina話咁快就貼出同日本新歡Rikki Furuya同遊嘆海鮮。不過，疑似被女飛嘅劉鳴煒亦唔執輸，上星期就被《蘋果》讀者唐小姐透過「爆相爆片」分享佢同新女伴撐枱腳。
今個月12號晚上7點幾，唐小姐直擊劉鳴煒同新女喺平民化餐廳「翠華」食晚餐。相中所見，西裝骨骨嘅劉鳴煒揀咗靠近水吧嘅角落位，靜局之餘周圍又冇人，綠色燈光下好有情調，女伴就留長頭髮，全身黑色行政打扮，見佢望住劉鳴煒時甜笑又托腮，似乎好享受二人世界。
揀偏僻位置坐
唐小姐話：「劉鳴煒入到門口，掃咗個場一陣，好似約咗人咁，佢問咗個女侍應幾句，就走咗落去餐廳下一層，後尾發現原來有個女仔坐咗喺餐廳下一層等佢，佢哋坐嘅位置係喺較偏僻嘅水吧位隔籬，餐廳下層最入嘅位，當時餐廳人流唔多，都唔見有侍應同食客認得佢係大劉個仔。劉鳴煒一坐低就開始揭餐牌，見佢同個女仔都幾好傾，仲問個女仔想食乜，個女仔都笑得好開心，不過就聽唔到佢哋內容講乜。」