昨日講馬場遇到金融界人士基金T，談及澳門金融中心問題。賽馬後翌日下午，參加一個聖誕酒會，本想同主人家握手之後，遊走一圈就拜拜鬆人，但在全場走咗半個圈，握咗近二十次手之後，就遇上應該退休（以年齡計）而仍未退休嘅律師A。大家年輕時相識，眨吓眼三十幾年，佢嘅「見習律師」徒弟今天已成為馬會VM（遴選會員）咯，還在工作，可見寶力未老，律師樓唔想佢退隱住。律師A處理IPO個案之多，多過左丁山去曼谷次數，於是特登問佢：「如果澳門成立人民幣交易中心，你地會唔會去澳門建立橋頭堡，抓緊商機？」律師A飲啖白酒，話：「有生意邊個唔想做，搞交易所，搞上市，一定要搵律師嘅啫，但我地成間律師樓冇個律師識得葡萄牙文，大概全香港都未必有一打半打識得葡文嘅華人律師，起碼我唔識先。澳門法律好蝦人，我爸爸在日本佔領香港時代到澳門逃難，買咗一間舊屋，戰後係我家度假屋，爸爸十幾年前逝世，由我辦申領遺產手續，香港當然冇問題，淨係澳門間屋，到現在仍然未搞得掂轉名手續。澳門法律對財產權業權之法規，十分複雜，在澳門搞IPO嘅話，相信唔會輕易。」
左丁山懶醒，對佢講：「索性由人大宣佈在澳門使用適用於上海及深圳之股票交易法例，可否取代葡萄牙／澳門法例？」律師A瞪起隻眼：「咁仲係一國兩制咩？」
左丁山連忙走開，走近門口，畀富翁K捉住傾幾句，佢又講澳門喎！原來佢在澳門出生，有出世紙，身份證，老早憑此攞咗葡萄牙護照，早年因為澳門缺乏機會，父親送佢嚟香港讀中學、大學，畢業後營商發達。富翁K話：「習主席恩賜澳門禮物，我要睇吓有乜可以益到我，搞金融，睇怕冇乜肥水啩，有好多澳門朋友都因為來咗香港讀書，在香港生咗根，最大好處就係我現在仍然可以每年得到澳門政府派錢一萬元。中央賜賞澳門人民好易㗎咋，唔駛搞金融中心咁複雜，只要一聲令下，放寬內地遊客到澳門刷銀聯卡，入賭場刷銀聯卡上限提高，澳門人就可以年年得到政府派利是！濠賭股好景，大家happy！」
富翁K呢類澳門人真正爽，既可享受澳門賭場經濟紅利，又可持葡國護照在歐盟周圍行不愁脫歐，最過癮就係葡萄牙政府寄來選票，叫佢投票選葡國總統。富翁K話：「澳門特首我冇資格選，葡國總統我就可以投票，澳門係一埠三制，60年前啲難民逃到澳門仲要屈蛇偷渡香港，現在諗番起，佢地都幾笨！」唉，有早知，冇乞兒，2019年唔知2079之事，1959之時，點會諗到2019喎！（按：左丁山fact-check，富翁K所言，其實一半真，今年10月6日係葡國選議會議員。）