【本報訊】《逃犯條例》修訂撤回後，運動未有平息，警暴取而代之成為市民關注焦點。90年代曾任警監會﹙監警會前身﹚成員的大律師沈士文指越多的結越難解：「半年裏面，畀市民印象唔係一個人或者一team（小隊）警察行為嘅問題……去到個階段，市民點解覺得咁唔公平或者委屈？係太多呀！」他質疑警暴反映結構性問題，警隊作為紀律部隊「有force﹙武力﹚然後仲有冇disciplinary﹙紀律﹚？我真係唔敢講」，相信惟有「擴充版」獨立調查委員會才是出路。
批評政權縱容
超過四分一世紀的執業生涯，沈士文做過不少探監工作，他談起「行家」現時到警署接觸被捕示威者時也感無奈：「等5個鐘頭，理由千奇百怪，（警方指）嗰個人唔係呢個警署、太多人被捕佢冇紀錄，後尾過咗一段時間又話喺呢個警署，然後又冇房」，他回想自己過往若過了20分鐘還未獲安排會見客人已要求落簿投訴，「好多好多我哋以前從來冇聽過嘅原因，點解𠵱家佢哋會提出表面睇係唔合理嘅原因呢？呢個係咪結構性問題？」
曾擔任警監會成員6年的沈指，以往警察行為確受監管，「舉例講去財仔借錢，炒得！俾人證明到同黑社會有關係，炒得！你同市民抄牌講粗口，市民對你講粗口你反駁講粗口，即刻記落簿到」，但至2019年，警察卻公然辱罵示威者「曱甴」，以粗口對待市民，沈指警方一度要求立辱警罪，「其實普通人一般印象係唔需要再成立辱警罪，因為佢哋已經自己成立咗」。
沈士文指，政權縱容警暴成為市民的心結，「其實《蒙面法》剩係掩住一邊嘅面，就係好好例子，令我哋解釋到市民點解覺得唔公平」，「過咗6個月，咁多片、咁多市民投訴，包括7.21，然後一個警察都冇錯嘅，𠵱家4點鐘（警方記者會），畀任何片佢睇佢都話警察冇錯，剩係statistic去睇，本身已經唔可信啦，咁樣咪解釋到市民點解唔接受，唔信囉」。
他強調法治精神重大環節在於政府，包括警隊依法辦事，「違法嘅話一定要接受check and balance（監察）」，至今惟有獨立調查委員會可以嘗試還市民公道。
■記者梁穎妍