中美貿易談判達成第一階段協議，股市當然是依照規律，好消息出貨，消息公布前，連續升近1,300點，公佈後，立即有獲利回吐。好嘞，自去年四月開始炒作嘅中美貿易消息，暫告一段落。2020年大家有乜消息好炒？睇嚟要還原基本步，要睇公司盈利及整體經濟，此外還要看變幻莫測嘅特朗普有乜奇怪招數。有咗特朗普呢位奇人做美國總統之後，世界股市極受政治消息影響，傳統股市分析師幾容易中招。搵食艱難。
星期日在馬場，第一場就落沙圈捧校友C隻馬，70倍喎！例牌買獨贏位置各10元，再買一條四連環，捧校友隻馬拖全餐，每注1元，校友C都知道自己隻馬冇乜希望，問左丁山點落注，左丁山在近距離觀察14隻馬行圈，睇中兩隻，就係9號無敵勇士，1號傳盛，一於買9號獨贏，1號搭9號單Q，結果1號第一，9號跑第二，輸Win中Q，仍有利可圖，有咗是日本錢，輕鬆得多啦，第二場買大熱門10號得賞，拖幾隻馬買單T，其中包括馬圈大紅人陳南祿嘅50倍冷馬「天地同心」，哈哈中到正，更加有子彈，拎張飛向朋友示威，點知石禮謙議員仲威，講一聲：「細路，睇我中乜嘢？」一望佢手持幾張飛，好唔得掂，W Q P三重彩全中，收近一萬六千元！石禮謙呢排係政壇紅人，立法會主席梁君彥話阿石係最受歡迎人物，紅黃藍白黑色都喜歡佢。鬼唔係咩，左丁山見石議員在反修例初期講得出：「我無能」，好似兩個月前又公開痛罵陳帆局長，呢份功力實在非同凡響。
收咗兩場錢，心情舒暢，得閒同人傾偈（暫時唔講馬咁解），再落完沙圈之後，見到金融界人士基金T，問佢對傳聞習主席會賞賜澳門乖孩子，中央幫助澳門建立一個以人民幣計價的交易所，有何睇法。基金T大笑：「成功機率係好似天地同心咁，起碼50倍。天地同心係一匹質素較低嘅第5班馬，由練馬師谷到火紅火綠先至跑入一場冷Q，以後想贏都有難度，但並非不可能。澳門一百年來獨沽一味，靠賭場及相關事業，已食得飽飽肥肥，中央叫佢搞金融業務，仲話要以葡語國家為焦點，咪玩啦，澳門何來金融人才，恐怕要上海派大量人馬過澳門先至可以幫到澳門入閘！」並非睇小澳門，叫香港今日開始賭，香港都唔可以搵到咁多荷官與賭場管理人員啦，梗係要向澳門借將！澳門要與香港競爭金融事業，只係一個長官意志產生之計劃經濟項目，葡語國家有巴西及非洲莫三鼻給，葡萄牙語系國家全是國際金融之死水，冇乜生機嘅咋。