唔係八方專登搞針對，而係民建聯周浩鼎嘅表現真係太過出色。噚日朝佢主持立法會人事編制小組，傾發展局同地政總署各開一個測量師職位，得一個議程咁大把，結果都搞到俾民主派突襲成功，否決咗個撥款。鼎，真係多謝晒你！
其實政府開呢兩個測量師位，主要係想做吓類似Google Map嗰啲三維數碼地圖，根本唔大爭議，民主派不過想將兩個職位分開表決。
秘書提示先識醒
好歹都做咗成年人事編制小組副主席嘅阿鼎，今年爭咗個主席嚟做，結果做成點？個會去到加時階段先投票，阿鼎又唔數吓票，不知就裏叫投票，結果一舉手，投反對嘅民主派多過投支持嘅建制派，成個撥款就咁否決咗，仲要宣佈結果嗰陣由秘書提醒，佢先知道係否決。
查實無論做主席、議員抑或做官，都要識數票，明知唔夠票又照投，咁咪攬炒囉！八方綜合唔少建制派做主席時，一旦發現唔夠票，咪拉吓布，又或者話不如下次開會先投票啦，再唔係就問吓有冇人要記名表決囉！除非阿鼎經歷區選大敗有覺醒，做咗無間道啦！
李八方