【娛樂人物】新晉導演黃綺琳執導的香港電影《金都》，上月無懼內地打壓參加台灣金馬獎，其宣傳海報是一名頭戴防毒面具、身穿婚紗雙手擎槍的新娘，身在太子金都大廈門前迎戰，跟近日現實中太子一帶的抗爭者無異。但導演黃綺琳解釋海報是兩年前所畫，與社運無關，不想被誤會「抽水」宣傳，但卻沒想到超現實的創作，卻成為現今的真實畫面。
採訪：張明
攝影：仇志德
黃綺琳早前在台北接受《蘋果》專訪，提到執導的電影《金都》的誕生，一切源於她從小就住在太子聯合廣場樓上，每日面對金都大廈，見證太子區的發展，因參加「首部劇情電影計劃」，黃綺琳編寫了這個關於婚姻及太子社區的故事，找來鄧麗欣（Stephy）和朱栢康主演。她說：「劇本都係望出窗睇住金都所寫，細個走入金都都有夢想，就係大個要着呢條裙，到大個做姊妹、伴娘，發現原來結婚係好貼地、現實嘅事，同男朋友嗌交、同男朋友屋企人嗌交，我朋友嘅未來奶奶都係好麻煩，所以寫咗呢個以結婚為題材嘅故事。」
社會影響創作
《金都》的英文戲名是《My Prince Edward》，整齣戲在太子拍攝，黃綺琳解釋：「戲中男主角叫Edward，係Stephy嘅王子，所以就有咁嘅戲名。」今時今日提起太子港鐵站，少不免會勾起香港人「8.31」的沉重記憶，黃綺琳表示：「我哋參加『首部劇情電影計劃』時係2018年，交劇本係2017年，電影海報畫咗個女仔喺金都商場出面，着住婚紗好似打緊仗咁，揸住手槍戴住防毒面具，其實張海報喺兩年前畫，點解畫咗𠵱家境況？真係一個巧合，畫嘅時候用超現實去表現，但係個超現實𠵱家竟然變咗現實，所以真係咁啱，我唔想畀人覺得係抽水。」至於會唔會覺得好沉重？她說：「𠵱家『Prince Edward』嘅意思可能唔同咗，我個出發點唔係咁，只係表達對社區嘅感情。」
現在社會受負面氣氛籠罩，黃綺琳表示對所有創作都有影響：「唔好話𠵱家社會氣氛差會影響電影行業，其實各個行業都有影響，至於創作上嘅影響一定有，每日都好多事發生，每日都影響人點樣睇自己，我哋同身邊人、社會關係、對未來前景，全部嘢都會影響所有人創作。」
望有國際視野
片中，女主角Stephy表達對婚姻的想法，黃綺琳坦言劇本是真實的個人感受：「去到30歲，身邊好多朋友結婚，我未結婚，初時冇意識過婚姻對自己係咁重要，諗番原來細個時一直已經圍繞住我，會問點解爸媽會結婚，爸媽好內斂，唔會喺你哋面前錫或拖手，我問過阿媽，個老公係唔係政府派畀你，幾多歲有老公派，同點樣申請，到長大先認識到拍拖同婚姻。」
《金都》無懼內地打壓，上月參加台灣金馬獎，黃綺琳更獲提名「最佳新導演」，雖最終落敗，黃綺琳表示有看過其他入圍新導演的作品，覺得水準非常高，她說：「我自問未去到呢個水平，飛車動作我係一啲都唔識拍，台灣新導演好成熟，好有自己風格。」電影製作費325萬、本土題材，但黃綺琳強調並非刻意：「電影唔應標榜係咪本土，暫時能力上只能拍香港、廣東話題材，希望將來自己有國際視野。」
場地提供：電光影裡書店（台北）