早排網上瘋傳警總將個電梯大堂變成一個巨型中國象棋棋盤，而「忠誠勇毅 心繫社會」新口號就代入八隻象棋，已經俾人笑係咪預視注定做棄卒，點知將自己當棄卒未算出位，原來警總仲有個靈堂式設計電梯大堂，先令人嘆為觀止。
原來棋盤大堂曝光後，日前網上又流出另一張疑似係警總其他電梯大堂嘅相。呢張相見到大堂牆上打橫寫咗「忠誠勇毅 心繫社會」八隻大字，個底色又係灰灰白白，而大堂放咗兩塊板，貼滿撐警圖畫及問候卡，中間放張長枱，放咗堆獎盃獎座，由於張相影得好暗，有網民睇睇吓，覺得乜咁似靈堂？嗰兩塊貼滿問候卡嘅板，越睇越似弔唁花牌，張長枱好似放弔唁冊畀人簽咁。有網民不禁問好人好姐見到咁嘅設計都覺有問題，但班差人又可以當冇嘢，差人唔讀書係人都知，連設計好醜都唔識分，成個靈堂feel大堂可以出出入入冇人覺有問題，真係大吉利是！