利物浦周二喺英格蘭聯賽盃八強，喺大部份主力要遠征卡塔爾出戰世冠盃嘅情況下，只能派出隊史上最年輕嘅正選陣容硬撼阿士東維拉，雖然最終淨吞五蛋，目送對手自12/13年球季以嚟，再次殺入英聯盃四強，但紅軍一班後生仔嘅演出其實一啲都唔失禮。經過身在卡塔爾嘅領隊高普半場越洋教路之後，佢哋喺下半場搶番唔少攻勢，就算最終大敗而回，都總算上咗非常寶貴嘅一課。
利物浦今場由U23教練基列治尼領軍，包括哈維艾利洛同基賀華在內嘅正選陣容，平均年齡只有19歲182日，但係佢哋一啲都冇怯場，開波頭10分鐘嘅攻勢仲非常有威脅，只可惜踢到14分鐘就俾主隊嘅侯利漢尼主射罰球先開紀錄，打窒咗道氣，結果半場已經失咗四球。
法林明高殺入世冠決賽
不過，喺卡塔爾睇住直播嘅高普，半場就特別打番去教路同打氣，叫班後生仔勇敢啲，堅持住上半場嘅打法。紅軍喺更衣室返出之後，果然生猛番晒，仲搶到唔少攻勢，可惜都係入唔到波，到補時階段仲俾維拉嘅韋斯利摩拉斯入多球，最終輸0:5。基列治尼賽後大讚一班小將嘅演出，仲話高普肯定收貨，佢又透露維拉嘅領隊甸史密夫同助教泰利，賽後都特登走入紅軍更衣室鼓勵班球員，非常有風度。
順帶一提世冠盃嘅戰況，貴為南美自由盃冠軍嘅巴甲勁旅法林明高，喺周二首場準決賽以3:1反勝亞冠盃冠軍希拉爾，率先殺入決賽。