自從長和資深顧問李嘉誠講咗句對年輕人網開一面之後，建制陣營甚至北京極左派即向佢開火，仲抹黑佢做「曱甴王」，雖然超人似乎冇放喺心，但佢旗下公司有乜動作，都立刻引起好多聯想同解讀，好似噚日facebook瘋傳屈臣氏蒸餾水樽嘅相，上面印咗「成功、加油」雙向字，又講明為香港學生打氣，就引起好多人聯想。
成功倒轉變加油
噚日facebook瘋傳嘅屈臣氏蒸餾水樽相，有人特別圈出個樽印咗「成功」兩字，倒轉就變成「加油」，仲寫明「為香港學生打氣」，而呢個雙向字來自日本書法大師野村一晟，佢曾寫過將「香港」兩字反轉變「和平」，撐反送中運動，屈臣氏蒸餾水呢個樽，自然引來網民無限聯想，唔通超人又曲線表態？
不過屈臣氏官方fb好快發帖澄清，原來呢個屈臣氏蒸餾水樽早喺2018年中5月推出，當時係為參加香港公開考試DSE應屆考生打氣，樽身設計屬2018年一次性限量設計版，有關活動亦已於今年3月結束。睇到呢度，好似又係一場舊聞當新聞嘅美麗誤會，但無耐又有網民發現屈臣氏係官方fb刪咗澄清po，究竟因唔想再搞大件事，定有其他原因？
李八方