曾飲過量險死
歐陽震華做跑腿買酒

【跑馬地】現年59歲嘅歐陽震華（Bobby）最近為無綫劇《伙計辦大事》開工，但忙拍劇之餘日前都抽時間去買酒。當晚8點幾，Bobby嘅座駕停咗喺跑馬地路邊，架車打咗死火燈，原來Bobby喺對面馬路一間酒舖極速買酒。其實半年前都撞過佢幫襯呢間酒舖，應該係常客嘅Bobby預先一早落咗order，當晚店員一見到佢已經即刻攞咗幾支酒入袋，Bobby好快畀完錢就離開，幾分鐘已經搞掂。當Bobby發現記者後，走出酒舖就禮貌咁揮吓手，問到係咪買酒飲？佢笑住話：「唔係自己飲，幫朋友買。」講完就上車走人。

愛約圈中人開P

Bobby圈中朋友極多，佢同太太傅潔嫻又愛熱鬧，經常約埋三五知己聚餐開派對。6年前嘅年初二，Bobby同老友陶大宇、謝天華、郭政鴻等開P，飲酒狂歡後疑因為飲酒過量，搞到急性肺炎昏迷送院，最後搶救12小時，差啲變植物人。大步檻過後，福大命大嘅Bobby雖然冇戒酒，但仍深覺命仔同老婆最緊要，開始注重養生，定期睇中醫調理身體。老婆傅潔嫻亦好緊張老公健康，不時燉冬蟲草同燕窩畀老公補身，Bobby更誇張到乾瑤柱當零食。近年Bobby開始減產，一年只拍一部劇，過慢活人生。