求驗客手記:太子爺出馬斟回巢阿迪達山寨廠長

求驗客手記:太子爺出馬斟回巢
阿迪達山寨廠長

啱啱輸完0:3畀曼城嘅阿仙奴,睇嚟覺得家陣暫代領軍嘅龍格保冇乜料到,趁今個周中冇波打積極搵新主帥,最新消息就係阿仙奴班主高安基嘅囝囝祖殊高安基,星期一晚已經同曾係隊內球員嘅曼城助教阿迪達密會,而且球會新行政總裁雲卡迪森亦俾傳媒影到出現喺阿迪達屋企門口。

奧燒Winning被下架

英國多間傳媒爆料,話阿迪達已經同太子爺祖殊高安基進行最後面試,而且據聞呢位哥迪奧拿副手亦有同曼城先溝通,兵工廠更派出談判代表同曼城方面接觸,因為如果真係要撬人,咁要支付部份補償費用,但阿迪達冇一隊執教經驗,阿仙奴或者只需要500萬鎊(約5,140萬港元)年薪,就能任命阿迪達為新廠長。

呢位37歲曼城助教,平時協助哥帥主理日常訓練同畀排兵佈陣意見,學到唔少嘢,加上球員時代曾經效力過兵工廠,熟悉球會運作同管理層要求,但最主要都係阿仙奴貪佢夠平。不過,麥臣同基昂等阿迪達嘅前輩,就認為阿迪達面對嘅任務實在太艱鉅,因為兵工廠神仙難救,何況係一位帥壇初哥?況且,阿仙奴家陣仲可能要煩埋奧斯爾俾中國杯葛單嘢。呢位球星喺網上發表不滿中國打壓新疆維吾爾族嘅言論,結果被全面「封殺」,除咗央視唔播兵工廠星期日對曼城場大戰,就連老牌足球遊戲《實況足球》(Winning Eleven)都要跪低,將奧斯爾由中國版嘅遊戲中「下架」,而新華社喺報道歐霸盃淘汰賽抽籤新聞嗰陣,都特登一字不提阿仙奴,面對強國玻璃心同咁樣嘅壓力,話唔定兵工廠一月轉會窗真係將奧燒賣走。

奧斯爾(右圖)因為撐維吾爾族,喺足球遊戲被封殺。互聯網

肥安嗒糖要再等

除咗阿仙奴密斟阿迪達,早前炒咗馬高施華嘅愛華頓,亦傳同上星期喺拿玻里落鑊嘅安察洛堤傾得七七八八,英媒仲瘋狂報道呢次請人好可能星期二就成事,點知拖肥糖即刻出聲明指董事會仲努力招募緊,睇嚟因為一日前先確認鄧肯費格遜仲會繼續帶隊踢星期三英聯盃,所以出嚟澄清,唔想影響軍心。