現年46歲的「花姐」黃慧君，既是ViuTV真人騷《全民造星》監製，也是MIRROR和ERROR的經理人，工作太忙令她兼顧不了人妻和人母角色。花姐日前和姜濤接受《蘋果》專訪，她坦承因照顧MIRROR而令老公不滿：「我唯一見啲仔係朝早7點起身送佢哋返學嗰一個鐘，好少見到個仔，內心都唔舒服。我老公好重視家庭，佢希望老婆成日返屋企，每個禮拜有family day，假期一齊去旅行，但當然我做唔到。」問到老公是否很憎MIRROR？花姐謂：「覺得佢哋麻煩囉！有時我喺屋企講MIRROR，佢話：『可唔可以唔好講！』」相反兒子是MIRROR粉絲，花姐表示：「但我老公唔鍾意囉，我同老公關係未至於好差，不過我有內疚。」現她惟有在工作與家庭中取平衡。
被投訴偏心
花姐坦言有MIRROR成員投訴她偏心姜濤：「最初嘅姜濤唔係好鍾意同人講嘢，所以我要同佢傾多啲了解吓，佢係傳媒焦點，佢有時會驚，我喺側邊佢定啲。」姜濤也直認過去一年跟花姐關係比跟自己媽咪更親密，回想初出道被傳媒追問有否拍拖，連「有」跟「冇」，姜濤也要問花姐：「不過我feel到佢𠵱家係放手咗好多。」
採訪：魯吉
攝影：沈健程