嗰班日日「爭取打交又破壞香港」嘅Popo，過去半年將香港大街小巷變戰場，仲不時當市民活靶練亂槍掃射，大賺加班費之餘，累積實戰經驗仲爆晒燈，邊個估到原來佢哋都仲要演習？但地點唔係揀警察宿舍，卻竟然走去搞公屋嘅地方。
就近PTU總部
網民報料話警方通知粉嶺嘉福邨個屋邨物業管理處，噚日要由朝早8點到傍晚6點喺屋邨範圍、部份大廈天台同後樓梯進行訓練演習，呢啲地點咁敏感，唔少網民都話一定要睇實，留意有冇「被自殺」事件發生。
嘉福邨其實係Popo演習熱門地點，因為PTU總部就喺對面，但噚日八方等咗大半日，最後都冇見到Popo現身，相信都係好事，因為過去呢啲演習製造噪音擾民，會引起街坊不滿，Popo拎住支假槍四圍行，又嚇親邨民，而無論係一班防暴入邨定蒙面便衣出動，都應該似恐襲多過演習，八方仲真心覺得Popo演習太無謂，事關演一套做另一套，根本冇訓練演習作用囉！