西甲「國家打吡」，兩大班霸兼死對頭巴塞隆拿主場迎戰皇家馬德里，會喺禮拜三上演。大戰前夕，巴塞先喺上禮拜六聯賽失分，喺禮拜日登場嘅皇馬亦步後塵，作客華倫西亞喺比賽尾段失守，靠身高有兩米嘅門將泰拔高圖爾斯喺補時棄關助攻，由賓施馬補中逼和1:1，家陣同巴塞同得35分。今季頻入波嘅賓施馬，近10次國家打吡都攻唔破巴塞大門，但佢就對禮拜三大戰充滿信心，目標直指喺今季重奪西甲聯賽冠軍。
補時1:1逼和華倫
同皇馬喺上禮拜歐聯作客3:1贏布魯日嘅陣容比較，今場有唔少主力回歸擔正，包括賓施馬。開賽初段皇馬攻勢佔優，但費達歷高華維迪、賓施馬同卻奧斯等多次埋門都無功而還，半場互無紀錄。下半場主隊華倫西亞加強施壓，到78分鐘卡路士蘇拿接應丹尼爾華斯右路地波傳中掃入領先1:0；皇馬全力反撲，到下半場補時五分鐘有角球機會，高圖爾斯走埋上對手門前，接應傳中頭槌攻門，雖然俾華倫門將查奧美杜明尼治拍出，但賓施馬喺混戰中執到雞，幫皇馬以1:1逼和華倫西亞各得1分，禮拜三國家打吡前，各賽事已連續11場不敗。
賓施馬望鬥巴塞贏波
球王基斯坦奴朗拿度喺上季離開皇馬，家陣31歲嘅賓施馬就肩負更大入球重責，成為陣中進攻主力。呢位法國前鋒喺今季表現出色，各項賽事上陣21場入16球，佢喺賽後話：「現階段我喺比賽上充滿自信，有助我入更多波；我嘅目標係喺今季重奪西甲冠軍，會喺全方位去幫助球隊，無論係入球定係領導都係。」嚟緊要作客巴塞，對於喺近10場國家打吡冇波入嘅賓施馬肯定唔易應付，佢話：「作客魯營球場肯定好難踢，但希望我哋可以全取三分，對巴塞一直都係皇馬喺每季最重要嘅比賽。」
另一功臣高圖爾斯就話：「我嘗試喺角球時利用我嘅身高優勢，我身高有兩米，對手一定會勁緊張，卻奧斯傳個波去近柱，當時我接應得唔錯，然後賓施馬就入波。」教練施丹指出，完場前係高圖爾斯自己決定上前爭頂，佢亦大讚球員士氣十足。
