祖雲達斯禮拜日喺意甲迎戰烏甸尼斯，最終依靠基斯坦奴朗拿度（C朗）同邦路斯嘅頭槌入球，幫祖記喺主場以3:1擊敗烏甸尼斯。
賽前排第二嘅祖記，喺開賽早段已取得領先，九分鐘保羅戴巴拿喺禁區射門被擋，C朗跟上撞射得手；37分鐘，希古恩交出直線，C朗殺入禁區射近柱入波；臨完半場前，邦路斯門前頭槌破網，領先3:0。直至下半場93分鐘，烏甸尼斯靠普錫圖禁區內入球追番球，最終祖記以3:1輕取對手。
至於較後時間出賽嘅國際米蘭，雖然由倒戈相向嘅中場保查華利路喺八分鐘入球領先，但去到補時兩分鐘終於守唔住，被費倫天拿19歲小將杜辛荷域獨闖龍潭射入破網，結果兩隊踢成1:1平手。痛失兩分嘅國際米蘭，賽後同衞冕嘅「斑馬兵團」同樣16戰得39分，並憑住較佳得失球續居榜首。