【黑鏡線索】fb變臉嘅文宣啟示 - 宋漢生

【黑鏡線索】fb變臉嘅文宣啟示 - 宋漢生

【黑鏡線索】
香港人要號召自由世界盟友支持,對外國朋友文宣好重要,向國際顯示警暴幾嚴重,當然有用,但係要持續,始終要解答一個關鍵問題:why does Hong Kong matter to me?

扯遠啲講,科技界裏頭,近年最驚人嘅變臉表演,應該非fb嘅Zuckerberg莫屬。Z不嬲都係擦中國鞋擦到出面,事關fb可以霸佔嘅市場,已經佔晒,世界版圖唯一嘅漏洞,就係中國市場嗰幾億用戶。於是你見佢又學普通話,又去天安門霧霾中跑步打卡,又央求習大大幫佢個女改個中文名,x-rated級露骨。

掉轉槍頭踩中共

結果都係無功而返,一啲中國市場都攞唔到。前排走出嚟演講,忽然間變成高調踩中共。佢大講美國核心價值,言論自由,然後筆鋒一轉,話fb一直堅持唔放啲數據中心喺侵犯人私隱嘅政權腳下,又話中國喺世界互聯網,越佔越大份。佢話,十年前,最大幾個互聯網平台,都係美國嘅。到咗今日,十大中國竟然佔咗六個。

點解關佢事?講白啲,fb就好似Microsoft當年咁,喺美國國內,受緊越嚟越大壓力,話佢太大太惡,要打散佢嘅壟斷。Z就話,fb歸根究柢,都係擁抱美國核心價值,唔通你哋想俾中國贏?想中國輸,就要有強大嘅fb代表美國抗衡。所以,美國上下,應該槍口一致對外。中國先係最大嘅威脅,fb其實係好人,大家唔好再花無謂時間去搞fb。

Z講呢番說話,確實好方便,你將佢同蘋果比較,蘋果喺香港地圖事件,跪,中國VPN事件,又跪。係,有壓力跟當地法律,大家都明,但佢為自己做法申辯講嘅嘢,就真係好肉酸。反而fb一直打唔入中國市場,到而家壞事變好事,至少都算係用檸檬整咗好大支lemonade,可以話係享受緊「入唔到中國嘅紅利」。

中國以前畀世界嘅印象,係世界工廠,專門出口產品。但胡溫年代開始,已經有所謂「北京共識」,去挑戰美國主導嘅「華盛頓模式」內容,建議去睇利世民嘅文章,重點係,中國宣稱已經有足夠嘅「制度自信」,輸出制度,去挑戰美國。亦即係由出口產品,轉為同時向全世界輸出中國式獨裁經濟政治影響力。其他國家嘅人,可能唔係好介意日常用品made in China,或者中國裏面嘅人被高壓統治,但當made in China嘅價值觀殺到埋身,就係另一回事。

輸出獨裁惹敵意

從呢個角度睇,Z變臉,提供一個對外文宣嘅啟示。佢嘅潛台詞係:中國輸出獨裁,想影響埋美國,咁我哋當然要抗衡,而我就係抗衡嘅好幫手,THAT is why fb matters to you。同一條方程式:中國輸出獨裁,想影響埋「你嘅國家」,你哋想抗衡,我哋就係"say NO to China"力量嘅最前線,THAT is why Hong Kong matters to you。至於再進一步去本地化個文宣,除咗繙譯,可以舉個當地人明嘅例子,提醒佢中國點樣對佢哋輸出獨裁,例如同美國人講NBA、Blizzard事件,同澳洲人講中國買通政客事件等等,將個重點放返嚟聽眾度,令對方明白件事幾貼身,會更有共鳴。

原本好哋哋,對外輸出產品,對內高壓獨裁。但係忍唔住輸出埋獨裁,咁就出事,挑起其他國家嘅敵意,態度忽然鐘擺去另一端,群起而攻之,當正你係賊咁辦,於是好似華為咁,連原本有嘅產品市場都冇埋,喺本身經濟就唔掂嘅情況下,真係自己攞嚟嘅雪上加霜。

撰文:宋漢生
fb : sunghsblog