建制派喺今次區選大敗，但要數到輸得最甘，葉劉淑儀嘅新民黨認第二，應該冇人會認第一，因為佢哋加埋盟友「公民力量」在內，派28人參選全部輸晒，喺區會層面一次亡晒兩個組織，有冇後來者八方唔知，但就肯定前無古人。葉劉日前接受訪問，仲好寸咁話佢哋總票數比自由黨多，不過即時俾網民恥笑葉劉唔識計數死撐外，自由黨榮譽主席田北俊亦喺fb發文寸佢滅黨都不知悔改。
卸膊怨政府施政唔掂
葉劉接受Now新聞台訪問，話建制派區選崩盤式大敗係政府施政引起，需要問責嘅係政府，唔係佢。有網民睇到已經寸佢，葉劉係行政會議成員，行會肯定係政府最高決策層一部份，政府推乜政策都要上行會，為乜𠵱家身為行會成員嘅葉劉，可以講到政府施政完全唔關佢事，跳船跳得咁快？
之後葉劉又話雖然區選輸晒，但得票總數比有五席嘅自由黨仲多，有網民立即寸佢同毅進警一樣亂噏數字幫自己死撐，笑佢新民黨派28人參選，自由黨派11人，葉劉出選人數多自由黨逾倍，夾埋嘅票梗多過自由黨！又唔見講新民黨參選人平均得票率只有39.43%，低過建制派整體得票率40.98%？連田少忍唔住喺fb發文寸佢，話葉劉搞到同佢合併嘅公民力量滅黨，仍不知悔改，仲要寸自由黨總票數比佢少，叫葉劉「葡萄都無用啦，多票數又點啫，咪又係一席都無！」仲要加hashtag#無議席又少likes#又無得選特首#慘慘豬，真係將葉劉寸到盡！
李八方