曹永廉一家日前同其他藝員去警總撐警送暖，又同警察公共關係科高級警司江永祥、總警司郭嘉銓同謝振中等影大合照，但有份出席嘅朱庭萱見撐警大合照流出，爆粗留言要求刪圖，又稱：「唔出鏡㗎害死人喇！」曾出言「黃屍食屎」嘅曹永廉首當其衝，前晚就被三間廣告商火速割席。
「愛比暴力強」
曹永廉代言四年嘅皇冠牌爐具、珠寶公司MaBelle同西裝店MODE by Eddie Tam，前晚各自喺facebook發聲明劃清界線，當中皇冠指代言人合約已完，撇清合作關係，獲網友一致讚決定明智，更大鬧曹永廉人如其名，係「Forever Cheap」、「愛比暴力強，支持與警暴、黑心偽人割席」。而MaBelle就指曹永廉出席旗下活動屬一次性質，而西裝店就停止贊助，同樣表示曹永廉唔係代言人，又指佢嘅言論同立場唔代表公司立場。
有份到警總送暖嘅姚瑩瑩，噚日凌晨亦喺fb發表撐警言論，以藍底白字留言：「正義的朋友（心照不宣）揮手區，無限感謝在心中。」更貼出數個藍色心心。曾經同佢合作嘅滴雞精、婚紗公司同BB濕紙巾廣告商火速割席，出聲明指姚唔係代言人，佢嘅言論立場唔代表商戶，有網友就鬧姚「自詡正義」。
為港督表演
此外，李嘉大前晚貼出揸大刀帖文表示愛國：「今生既披一身黃皮，則絕不可替白皮之流」、「寧死不當亡國奴」，就被網民起底小五時曾喺當時港督彭定康面前表演功夫。
李嘉噚日喺fb解釋：「在洋人面前揚我中國武術之文化，有何問題？！洋人幫老子擦汗，有何問題？」而蔚雨芯就喺Ig否認去過撐警。
撰文：馮仁昭