自由之夏變抗暴之冬，已經歷時半年之戰，究竟會延續至何時？運動似乎不會再短期看到黎明來到，同樣專制政權更不似會作任何妥協，那大家是否必然再次敗陣？還是有逆轉勝的可能？
記：點睇運動未來走向？四位唔同角色，覺得對方有嘢不完美要改善？最後有咩說話向手足、戰友、同路人講？
C：一個月前有人問我，我答佢我哋會輸，輸到去流血衝突嗰種。當時我係覺得，我哋同一個人類歷史上最仆街最X無恥、最X賤格嘅一個政權打緊，單靠嗰二百萬人，做到啲咩啫？終有一日我哋會輸。但過咗呢一個月，特別區選後、過咗《人權法》，如果我哋唔鬆懈，我哋會慘勝，但仲需要付出一啲代價。慘勝，我會話五大訴求唔會畀你攞得足，因為最基本係真普選，佢係唔會……尤其阿爺呢期係咁吹雞，讚賞澳門咩23條又乜乜物物，慘勝可能係放多幾個訴求，跟住香港人個momentum就會跌得快。
共建黃色經濟圈
岑：傘運係咪失敗？從結果論係失敗到仆街㗎喎大佬，普選無了期，爭取嘅嘢係無一成功。但如果無傘運經歷，唔會有今次和勇合一be water。五大訴求係咪一定爭取到？我無信心，所以先要堅持到底。希望每個遊行都有一百萬人、每一次出現火魔都打到差佬屎淋尿瀨，無可能發生。惟獨長久嘅，係將政治帶入生活，黃色經濟圈。但我哋仲有好多政治道德潔癖，點睇到？做藍絲機構，唔代表你係一個藍絲，可以因糧於敵㗎嘛大佬。
昇：食窮民建聯！
岑：咪囉，要同共產黨玩得好幽默好蠱惑好無賴，因為佢本身就係一個無賴。仲有要提醒班和理非！𠵱家同以未前唔Q同㗎喇，冇得行完慢慢返屋企。有時勇武等緊和理非走，佢吔仲係企係度話：「啲勇武係唔走，我哋要喺後邊支持佢」（岑反白眼）。你可以做和理非，但係5、6年以嚟嘅經驗，有啲嘢要改變。
對勇武提醒一句，行動時要講清楚。一個行為係中性嘅，藍絲黃絲都可以解讀，只做而不解釋，藍絲網軍就用佢哋方式去演繹，捽個臨界點。解釋清晰，對方要扭就難好多。7.1入立法會係好示範，議會不公平開嚟都冇用，拆X咗佢可能更好。手法上唔認同，但你哋講嘅道理，冇得反駁。
昇：我估警察嘅自我制約會強咗，區選後好明顯，真正幫民主派拉票嘅係警察，應該拎張錦旗多謝警察，可以聰明到「你住公屋有啲咩地位呀」？完全將大部份香港人激嬲晒。
建制派都會驚，新民黨或者梁美芬嗰啲，噚日如果遮咗佢個名，會以為係民主派，「搞個獨立調查委員會啦，不過要有調查權力㗎喎」。警察都開始感受到調查壓力，好簡單，警察本身係幫政府處理治安問題，但你自己成為咗個問題，你成為負資產，令建制派大敗，政府最應該同你割席。其實沙中綫都有獨立調查委員會，但廢到核爆。即使有委員會，係咪有成效都驚。但我哋要求都只係咁簡單，都未得到應承。
陳：轉做經濟戰線，年紀細嗰啲，可能會失落？或者覺得冇咗參與位置，行完後唔係好做到咩，會覺得真係去打狗，或者去堵路，先係具體做咗嘢，作為家長會有呢個擔心。長期戰，我哋最大能耐就係揸住中共個春袋，無能力打贏中共，但係有能力攬炒。但無人知究竟要等幾十年、幾代人、定幾個月就會支爆。前線係要生活、返學、返工，要佢哋有呢個覺悟，就係我哋家長要做嘅野。