與校友Y到上海總會吃午飯，一樓冇位，上到三樓坐低，問部長近來生意如何，部長話：「低位反彈啦，近日好旺，日夜都掂，我地會員好捨得食嘅，只要交通正常，佢地就會返晒嚟。」
咁就好啦，生意回復正常，大家心情都好啲。睇老友阿碌專欄，前星期佢坐高鐵到汕頭食牛肉（佢睇怕已食到上癮，去完又去），發覺汕頭食肆生意大不如前，旅遊景點水靜鵝飛，與今年五月情況，完全不同。阿碌周圍問，得到嘅印象係內地經濟增長急速放緩，食客人數大幅度降低，一間名店竟然中午時分全無一客。汕頭冇示威遊行都係如此局面，可見經濟與市面狀況，關連甚大，香港目前不見內地遊客湧至，未必全與示威衝突有關，一般內地人如非好有錢，都會識得慳錢，唔嚟香港消費嘅啫。
不過一位女性朋友L就話內地豪客不知有幾多，唔信可以去中建大廈一位女名醫診所睇吓。女名醫肯定係「星球人」，診所內擠滿講普通話女士，全部係不惜腰間錢來香港做檢查嘅。朋友L話：「幾個月來，從未見到女名醫診所人流疏落，內地女豪客唔知幾多，不過可能佢地減少咗睇完病之後就落置地廣場血拼啫。」
香港嘅高端服務始終不愁冇生意，只嫌人才供應不足而已。
坐坐吓，見到二十呎外一張枱有一位女士與朋友好好傾，望真啲，乃張大姐也，向佢招手，佢全無反應，於是傳一個短訊畀佢：「我坐在你對面！」張大姐一睇完電話立即望過嚟，隨即行過嚟講：「唉吔，我好蒙，視力唔係好清楚。好彩係你啫，曾經有一個朋友因為坐在我附近，我睇唔到佢，畀佢嬲咗一輪！」張大姐之後話：「我睇你在專欄講泰皇蒲眉蓬在1973年臨危任命法政大學校長為首相一事，好感動，蒲眉蓬真係叻得緊要，泰國人拜服泰皇，好有道理。」張大姐之言，令左丁山想到，泰國係君主立憲制，泰皇無實際政治權力，但蒲眉蓬在位期間，堅決不以公謀私，設立基金做慈善、扶貧，每年到農村巡視農民生活狀況，到各大學主持畢業典禮，於是積累到空前未有之道德力量，歷年以來憑政變上台之軍人全不敢動他分毫，人民奉之曰神明，故此每在危急關頭，泰皇可以發揮精神領袖之道德力量，往往一錘定音，軍頭不敢不從。最近香港特首到曼谷簽商業協定，唔知佢有冇試圖了解昔日蒲眉蓬之「無權勝有權，虛君勝軍事強人」嘅道理呢？唉，可惜今日泰國已非蒲眉蓬年代，有高不可攀之聖君在前，後人怎可能超越之。