由爭取五大訴求同針對警暴，不論和勇還是作為第四權的傳媒，警察濫暴問題已經成為彼此最大公因數。
記：呢幾個月，警暴可能令大家恨之入骨，但又無可奈何。
昇：以前會有個事實基礎，譬如一個人反抗緊於是用武力，係咪反抗緊，會有一個基礎。但𠵱家係冇嘅，條片睇住唔郁㗎啦，但都照打，然後警察話佢係反抗緊。搵真相，困難。我哋仲面對好多唔知名案件，8.31、陳彥霖、周梓樂等等，我哋揸住嘅資訊唔足以搵到真相……例如，警察成日都話喬裝警唔做犯法嘢，但我哋真係見過喬裝警嘅身上係有雷射筆。大家本來互相對峙，冇開波嘅理由，但係射雷射筆就會被認為係襲警，警察於是唔走，大家就繼續喺度烘，烘到某個位警察就會出手，個衝突又嚟。我哋對警察以往嘅了解，不足以解釋𠵱家嘅事。
C：先利申我本身好多朋友都做緊警察。佢哋溝通係有佢哋嘅system，即係佢哋係Android、我哋係iOS咁樣。因為同袍文化真係咁樣，點樣演變成警暴呢？真係路西法效應，即使你唔係直接警暴，同袍文化令到你啞忍。有一次，紅隧開花有兩個落單嘅普通軍裝，完咗7.21冇耐，佢哋用一個近乎求饒嘅語氣，話「7.21唔關我哋事」。再遠啲6.11，吹雞全民野餐，全民唱聖詩，灣仔佈重兵見人就搜，有個四、五十歲CID同我講：「小心啲我啲同事，癲㗎！」白警？我就覺得你唔拉黑警，即係你都係黑警，着得起套制服你都係榮辱與共，集體負責，唔好話唔關你事。
點樣去面對呢啲警暴？坦白講冇得打。邊有得打？我哋最叻嘅武器，就算你中火魔，其實唔係點傷到佢哋。嗰個中學Bio老師都講得啱，掟咗五個幾月，都掟唔L中。點解會用曱甴嚟形容我哋呢？呢句話當然好仆街去人性化，但宏觀啲去睇，我哋呢邊好多時防暴戙係度，已經唔敢郁，稍為向前我哋就散。我覺得警暴係惡性循環。
陳：傘運時嗰啲警察朋友已經割晒，十幾年連朋友都冇得做。特別感受？2014年差，𠵱家更差，根本冇人追究，監警會嗰啲唔知做嚟做乜？家長會點睇警察，主要係心痛前線手足。有啲比較大嘅家長，真係親生仔女會出去嗰啲，可能會疑惑「差人點解會咁？」佢哋自細就被灌輸差人係除暴安良。藍絲都分兩款，一款係支持政府，一款係支持警察，支持政府嗰啲好憎警察，支持警察嗰啲就覺得政府好無能，佢哋都有啲咁嘅人，所以先有一半人畀警隊零分。
助攻區選 令建制派覆亡
岑：差佬仆街，就一L定㗎喇。但作為一個左膠，避開一個扁平印象。我觀察當區警察係相對地合理，但嗰班防暴係必須要落地獄嘅，我冇辦法去原諒。我理解佢哋嘅同袍文化，防暴打完，當區嗰班全部都要OT，唔通影L晒啲片班防暴會睇咩？咪係分返去當區度睇，所以成個警隊對示威好大怨氣我好理解。
day one我就叫林鄭唔好匿埋防暴盾後面，搵差佬去解決政治問題，等於賠上咗成支警隊，作為你政治防火牆。我都唔知係講年、月定日好，呢場運動告一段落時，我哋點樣去面對呢班差佬？警隊做完唔合法嘅事，有4點鐘大話記招，不停地搬龍門，成個制度係崩壞晒。點樣透過重組令警隊變返一個真正嘅警隊，而唔係呢個政治打手？要思考。
我成日都恥笑差佬「戰術嘅高手，政治嘅白癡」，尤其圍理大，純粹係一條軍事L角度，佈陣係完美。透過中大，知道你哋對大學有情意結，然後請君入甕，突然一大隊防暴警去包圍理大，封到滴水不漏。但佢哋係政治白癡嚟，區議會選舉製造一場政治災難送畀建制派，𠵱家最憎差佬一定係建制派。
你哋頂頭老細係共產黨，共產黨最怕人有組織，最怕人有武器，你有武器有組織，就必須要under佢control。共產黨點樣可以容許你呢班人有善終呢？呢個就係佢哋欠缺嘅一個政治分析，林鄭死梗係一L定嘅，警察死梗都係一L定，呢個係救都救佢唔到。